Naalungiarsuup toqunera Kommunip ajuusaarutigaa
Ilaqutaasut ikinngutaasullu erlinnarnerpaamik annaasaqarput, misiginneqataangaarlutalu. Qanorluunniimmi oqalukkaluaraanni, qanorluunniit iliuuseqaraluaraanni annaasaq taama angitigisoq taarserneqarsinnaanngilaq.
Aamma pisumut tassunga atatillugu kommunip iliuuseqarsimanera tusagassiutinit apeqquserneqartoq paasivarput. Taamaammat Inunnik isumaginnittoqarfik matumunnga tunngasumik attavigivarput. Sulialli tamakku nipangiussisimasussaatitaanermut maleruagassaqarmata oqaaseqarsinnaanissatsinnut killiliisuuvoq, taama Inunnik isumaginninnermut pisortaq Mikkel Balle aamma ataatsimiititaliami siulittaasup Stine Egede Nørbækip tusagassiutinut nalunaaruteqarput.
Inunik isumaginnittoqarfimmut nalunaarummik tunniussisoqaraangat tamatigut iliuuseqartoqartarpoq. Pisortammi oqartussaasut ingerlataat allat inunnik isumaginnittoqarfimmit attavigineqartuartarput, tassa suliaq tamakkiisumik paasiniarneqarsinnaaniassammat. Nalunaarusiamilu allaaserineqartut ilumoortut paasineqaqqaarlutik Inunnik Isumaginnittoqarfik aatsaat iliuuseqarasuarsinnaavoq. Nalunaarusiallu imarisai uppernarsineqarsinnaanngikkaangata Inunnik Isumaginnittoqarfik suliamik ingerlatsiinnartarluni. Tassa nalunaarutiginnittoqarsimagaangat angajoqqaajusut Inunnik Isumaginnittoqarfimmut tamatigut aggersarneqartarput Kommunillu ilaqutariinnut sullissiviat aqqutigalugu immikkut ikiorserneqartarlutik.
Tassungalumi atatillugu inuppassuit qutsavigerusuppavut. Innuttaasummi Kommunimi pisut pillugit kommunimut inunnik isumaginnittoqarfimmulluunniit tusarliiuartarmata. Meeqqammi atugaannut tamatta akisussaavugut. Tusarliisoqartilluguli innuttaasup atini najugarisanilu tusarliinermini ilannguttarnissaa pingaaruteqaqaaq, tassami taanna saaffiginnittoq attaveqarfiginasuarneqarsinnaaniassammat. Tassa apeqqutit allallu suliamut pingaaruteqartut tamarmik pisariaqartissinnaasaratsigit.
