Naalungiarsuk qimarngunneqaraluartoq Tjekkiami napparsimmavimmiikkallarpoq
Taamanikkut naalungiarsuk quliinnarnik ullulik angajoqqaaminit marluullutik ikiaroornartumik atornerluisuusunit napparsimmavimmit qimarngunneqarpoq. Naalungiarsuk pinngitsaaliissummik arsaarinnissutaasussanngoraluarpoq. Thorinnguup angajoqqaavisalu nassaarineqarnerat angutaata arnaanit assorsuaq nuannaarutigineqarpoq. Susanne Lillegård Christensen siullermik ima eqqarsarsimavoq:
- Hurraa, oqiliallappunga, oqiliallaqaanga pingasuullutik ajunngimmata. Tusarlugit nuanneqaaq. Piffissaq ilungersunarsimaqaaq, nalugatsigimmi ajortoqarsimanersoq ajunnginnersulluunniit. Tassami ilungersunartorujussuuvoq inuppalaanngeqalunilu. Oqarsinnaavungalu sorsuutigisimagaat, nalunngilaralu naalungiarsummik qimarngussineq inatsisinik unioqqutitsinerusoq, taamaattormi periarfissillugit misilinniarlissuk.
Susanne Lillegård Christensenip neriuutigaa angajoqqaavisa Danmarkimut uterunik naalungiarsuk tigummiinnassagaat.
Ilaqutariillu Tjekkiamut qimaasimanissaat politiit sivisuumik pasisimavaat. Ilaatigut kikkunnit tamanit saaffiginnittoqarneratigut, DR-imiit Troels Jensen oqaluttuarpoq.
Oqaatigineqareersutut arnaa kalaaleq naartunini tamaat ikiaroortarsimavoq, naalungiarsunnguullu aamma sunnerneqarsimanera tamatuma aamma kinguneralugu, taamaattumillu inunngornermi kingornagut immikkut illuinnartumik katsorsarneqartussaalluni. Taamaattumik Thor qimarngunneqarnermi kingornagut inuunerminik navianartorsiorpoq.
