Naalungiarsuit inoorlaat 23-it toqungasut nasssaarineqartut

Arnat meerartaarusunnatik qitornisut nuunutitik napparsimmavinni karsiusanut iliartorsinnaanngorpaat, kinaanertillu isertuussinnaavaat. Tysklandimi taama aaqqissuussisoqarsimavoq.

Meeraaqqat toqungasut 23-t Tysklandimi eqqaavinni, uninngaartarfinni assigisaannilu qaammatit pingasut ingerlanerinnaanni nassaarineqarsimapput.

Taamaammat Tysklandimi oqartussaasut annertuumik paasisitsiniaanialerput, meeqqanut ”inissiisarfeqalersoq”.

Aningaaserivinni ulloq unnuarlu toqqorsiviit meeraaqqanut inissiisarfiit assigaat. Napparsimmaviit qarmaani ammanermik matusartumik sanasoqartarpoq, matugaannilu ungaavaraq meeqqat siniffianut kissassimatinniarlugu ulilikkamut, tassa kuvøse-mut, ingerlaannaq pissaaq.

Arnat nuunuaraatimik tigummiinnarnissaannik kissaateqanngitsut, nuunuaraatitik inissiisarfinnut taakkununnga ikisinnaavaat, kinaassusertik isertuulluinnarlugu. Minutsit 15-it qaangiuttullu kalerrisaarut aallartittarpoq, napparsimmavinnilu sulisut paasisarpaat meeraaqqamik inissiisoqarsimasoq.

Inissiisarfiit taamaatut Tysklandimi illoqarfinni arlalinni ikinnerpaamik 90-iupput, oqartussaasullu neriuutigaat meeraaqqanik inorlaanik toqutsisarneq, paasiuminaaqisoq, taamaalilluni annikillisarneqassasoq.