Naalliutsitsisarneq nunarpassuarni suli atuuppoq

Nunani assigiinngitsuni naalliutsitsisoqartarnersoq Naalagaaffinnit Peqatigiinniit misissuiffigineqarusuttaraluartoq, tamannali oqartussaasunit naalakkersuisorpassuarnillu itigartitsissutigineqartartoq oqaatigineqarpoq.

Paasisalli tamakku nuanniikkaluaqisut aamma nuannersortaqarput.

- Naalliutsitsisarneq nunat ikittuinnaat, aamma Danmarkip, atorunnaarsimavaat, Manfred Nowak Inuttut Pisinnaatitaaffinnut Naalagaaffiit Peqatigiit Genevemi ataatsimiititaliaannut oqarpoq. Inuttut Pisinnaatitaaffinnut ataatsimiititaliamut nunat ilaasortat 47-t kajumissaarpai naalliutsitsisarneq pillugu ajornartorsiutit eqqummaariffigeqqullugit.

Tue Magnusson Danmarkimi naalliutsitaasarsimasunut ikiuiniaqatigiiffimmi ilisimatusarfiusumilu (RCT-mi) ataqatigiissaarisuusoq oqarpoq, Naalagaaffiit Peqatigiit immikkut nalunaarusiaminni Danmark - nunat ikittuinnaat akornanni - naalliutsisarnermik nungutitsisimasutut taammassuk tamanna tulluusimaarutigisariaqartoq.

- Taamaattorli naalliutsitsisarnerup akiorniarneqarneranut nunatut siuttuuniaraanni, tamanna pisussaaffiliivoq. Danmarkip nunani tamalaani naalliutsissarnerup eqqartuussisutigut malersorneqarnissaanik piumasaqartariaqarpoq, soorlu naalliutsitsinerit Buship præsidentiunerata nalaani Bagdadimi Abu Ghraib-ip parnaarussiviani aamma Guantanamomi pisartut eqqarsaatigalugit, Tue Magnusson oqarpoq.

Magnussonip aamma tikkuarpaa, nunanut naalliutsitsisartunut tunniussinnginnissamik inerteqqut malinneqartariaqartoq, soorluttaaq nunat naalliutsitsisartutut ilisimaneqartut isertortumik paasiniaaasarfiinik suleqateqartoqartariaqanngitsoq. /ritzau/