Naalliutsitanik assilisanik peqarnerarneq aalassassutaavoq
Kikkunnulluunniit attuumassuteqanngitsunit misissuisoqarnissaa illuatungiliuttut piumasaraat.
Folketingip nunanut allanut ataatsimiititaliaa, allanut isertuussassanik aggustip 26-anni ilisimatinneqarpoq, Afghanistanimiut tigusat, qallunaat sakkutuuinit tigummineqartut assinginik imalimmik CD-mik pigisaqartoqartoq.
Tigusat Amerikamiunit qallunaat sakkutuuinut isumagisassanngortinneqarput, taamanimiillu tigusat naalliutsinneqartarsimanerannik tusatsiakkat oqatsiarnerillu imaaginnavipput.
- Qularutissaanngitsumik avammut saqqummiunneqartariaqartunik peqarpoq, taamaattumillu kikkunnulluunniit attuumassuteqanngitsunit misissuisoqartariaqarluni, Socialdemokratit siulittaasuat Helle Thorning-Schmidt oqarpoq.
- Pisimasut maanna ukiorpassuanngulersuni ingerlareerput, paasissutissanillu nutaanik maanna suli saqqummersoqartuarnera naammaginanngilaq. Taamaattumik kikkut tamarmik, aamma Danmarkimi naalakkersuisut, kikkunnulluunniit attuumassuteqanngitsunit matuminnga misissuisitsisoqarnissaa soqutigisariaqarpaat, Holger K. Nielsen SF-imeersoq oqarpoq.
Assinik pigisaqartoqarnera, illersornissamut ministerip Gitte Lillelund Bechip nunanut allanut ataatsimiititaliamut saqqummiuppaa. Ministeri pisimasut tamakkerlugit sukumiisumik ataatsimiititaliamut nassuiaasariaqartoq, Dansk Folkepartiip siulittaasua Pia Kjærsgaard oqarpoq.
- Isumaqarpunga illersornissamut ministeri nassuiaateqartariaqartoq. Tassami aviisini allaaserisat kisimik tunngavigineqarsinnaanngillat, Pia Kjærsgaard oqarpoq.
Naalliutsitsisoqartarsimaneranik tusatsiakkat, Danmarkimi naalakkersuisunit maannamut eqqunngitsuunerarneqartuartarput. 2007-imi ministeriunerusoq Anders Fogh Rasmussen Folketingip ataatsimiittarfiani ima oqarpoq:
- Matumani misissugassaqanngilagut, Anders Fogh Rasmussen oqarpoq.
Assit Afghanistanimiunik tigusanik naalliutsinneqartunik assilisaasut oqaatigineqarpoq.