Naalakkkersuisup aningaasaleeqqinnissaq miserratiginngikkaa
Saammaateqatigiinnissamut Isumalioqatigiissitap isumaliutissiissutimini bånditoqqat pilertornerusumik digitaliseererneqarnissaat inassutigaa.
- Nuannaarutigaara taamatut pingaartitsineq aamma saqqummiunneqarmat kulturikkut eriagisassat eriagisariaqaratsigit aammalu isumannaatsumik toqqortarineqarnissaat anguniartariaqaratsigu, Doris Jensen Jakobsen oqarpoq.
KNR-imi atortunut nutaanut naleqqussaasut, tassa digitaliseeriisut ullumikkut marluupput. allannguisoqanngippalli toqqorterineq ukiunik 15-it tungaanik sivisussuseqassaaq.
AAMMA ATUARUK Isumalioqatigiissitaq digitaliseeriinissamut KNR-imut aningaasaleeqqusisoq
Toqqorterineq sukkanerulissappat aningaasaliisoqartariaqartoq, KNR-ip pisortaata, Karl Henrik Simonsenip pingasunngormat KNR-imut oqaatigaa.
Aningaasaleeqqinnissaq miserratiginngikkaa
Doris Jensen Jakobsenip KNR-ip toqqorsiviani digitaliseerinissaq ukiuni qaninnerni naammassineqassappat aningaasaleeqqinnissaq miserratiginngilaa.
- Siunissami annertunerusumik inuiaqatigiinni atugaasinnaanissaat eqqarsaatigalugit internettimut ikkussuunneqassappata qulakkeerneqartariaqarpoq siullermik piginnittussaanermut tunngasut aammalu taassuma saniatigut sillimaniarnermut tunngasut qulakkeerneqartariarput aammalu aningaasanik naleqartussaasut qularnanngilaq, Naalakkersuisoq oqarpoq.
Aningaasaliinissarli neriorsuutigisinnaanagu, suleqatigiinnissamulli piareersimalluni oqarpoq.
- Kisianni aamma aningaasaliisoqassappat aningaasanut inatsimmut ikkunneqarnissaa sulissutigineqartariaqarmat taava Inatsisartut aamma tassani suleqatigineqartariaqarput, Naalakkersuisoq KNR-imut oqarpoq.
