Naalakkersuisutut inissat inissinneqarput

Naalakkersuisunngortitsiniarnermi naalakkersuisoqarfiit assigiinngitsut partiinit assigiinngitsunit tiguneqartussat partiit tunuliaqutaannit akuersissutigineqarnissaat utaqqiinnarneqalerpoq.

Atassutip siulittaasua Finn Karlsen ualimut radioaviisimut oqarpoq Inuussutissarsiornermut aammalu Aalisarnermut Naalakkersuisoqarfiit Atassutip tigussagaat siunnersuutigineqarsimasoq, tamannalu landstingsgruppimi siulersuisuunernilu aqagu ataatsimiissutiginiaritsik.

Finn Karlsen aamma oqarpoq Inuit Ataqatigiit Nalakkersuisoqarfiit qinigaafffimmi siuliani tigummisimasatik, tassaasut Peqqinnisamut Naalakkersuisoqarfik aammalu Aningaasaqarnermut Naalakkersuisoqarfik tigoqqissagaat siunnersuutigineqarsimasoq.

Siumup tigusussanngorpai Kultureqarnermut- Ilageeqarnermut Ilinniartitaanermullu Naalakkersuisoqarfik, Ineqarnermut Attaveqarnermullu Naalakkersuisoqarfik, Ilaqutariinnermut Naalakkersuisoqarfik kiisalu Naalakkersuisunut Siulittaasoqarfik.

Partiit siulittaasuinit aalajangikkat Siumut gruppianut unnummut ilisimatitsissutigineqarnissaat naatsorsuutigineqarpoq. Immaqalu aamma Siumut naalakkersuisuutitassai inuttalersorneqassallutik.

Ualimut naalakkersuisunngortiteqatigiinnissamut isumaqatigiissut isumaqatigiinniartunit missoqqissaarneqarpoq tassalu aamma naalakkersuisoqarfiit oqartussaaffiillu assigiinngitsut inissititerneqarnissaat oqaluuserineqarlutik.

Tallimanngorpat isumaqatigiissutip atsiorneqarnissaa naatsorsuutigineqarpoq.