Naalakkersuisut Uummannami innuttaasunik ataatsimiititsillutillu kaffillertut

Naalakkersuisut siulittaasuat Jens Frederik Nielsen (D) aamma Avatangiisinut Pinngortitamullu Naalakkersuisoq Jørgen Rosbach (D) Uummannami suliffeqarfinnut ullumi juulip 16-ianni tikeraarput.

Uummannami innuttaasut suliffeqarfinnut tikeraareerunik nalunaaqutaq 16.00-miit 17.30-mut kaffisoqatigissavaat.

Jens-Frederik Nielsenip Uummannami innuttaasut ilassinissaat qilanaarisimallugu KNR-imut  illoqarfimmut tikikkami oqaluttuaraa.

- Maanga tikinneq nuanneqaaq, nuannaaqaanga ullunilu tulliuttuni maaniinnissara allanullu tikerarnissara qilanaaraara.

Naalakkersuisut siulittaasuata innuttaasut oqaloqatiginissaat kaffillernerup siunertarigaa oqaluttuarpoq.

- Nalinginnaasumik innuttaasunik ataatsimiititsinerunngilaq. Qanimut oqaloqatigiilluarnerusinnaaniassagatta kaffisoqatigiinniarluta naapinniarpugut.  Nammineq oqariartuutitta saqqummiunnissaat pinnagu innuttaasut oqariartuutaat tusarnissaat uagutsinnut pingaarnerpaajuvoq.

Innaallagissiorfik 

Uummannami innaallagissiorfik ikuallannikoq KNR-ip ullualuit matuma siorna alakkarpaa. 

Suleqatigiinni aqutsisup Gert Kjærip ikuallannerup qinnermik banjoboltimit kaanngarsimasumit pissuteqarnerarpaa.

Suleqatigiinni aqutsisup Gert Kjærip Uummannameersup innaallagissiorfimmi qinnerup banjoboltip kaanngarfia tikkuarlugu takutippaa. Uulia taama pisoqarnerani seqqaqattaarluni siaruaassinnaalerpoq namminerlu ikummarsinnaalerluni. Assi © : KNR

Avatangiisinut, Pinngortitamut, Nukissiutinut Ilisimatusarnermullu Naalakkersuisoq Jørgen Rosbach Uummannami innaallagissiorfimmi juunip 22-ani ikuallattoqarneranut atatillugu paasisaqarnerorusuppoq.

- Akisussaaffeqarfinni alianartumik pisoqarpoq.

- Innaallagissiorfimmi ikuallattoqarnera soorunami naalakkersuisutut paasisaqarfigerusuppara. Aamma innuttaasunut qanoq innersoq tusarusuppara, qisuariarnerat isumaallu paaserusullugit.

Eqqakkat imermillu pilersuineq

Jørgen Rosbachip eqqaavilerinermut tunngasut ilaatigut eqqartorusuppai.

- Eqqaavilerinermut tunngatillugu aamma ajornartorsiuteqarpoq. Imermillu pilersorneqarnerat qanoq ippa? Sammisat assigiinngitsut taakkua eqqartorneqarumaarnerat qularnanngilaq.

Naalakkersuisut siulittaasuata innuttaasut isumaat angalanermini tusarusuppai.

- Suut tamaasa qitiusumit takusinnaanngilagut, taamaattumik innuttaasunik naapitsineq oqaloqateqarnerlu uagutsinnut pingaaruteqarluinnarpoq.

- Aamma politikkikkut sulinitsinnut pingaaruteqarpoq. Pissutsit pitsaanerulersinniarlugit inuit ulluinnarni inuunerat ilungersuutaallu eqqarsaatigalugit iliuuseqartariaqaratta.

Nukissiorfiit Facebookimi quppernerani allaqqasoq naapertorlugu, Uummannaq februaarip 23-anni ajutoortoqarnerata kingunerisaanik,  imermik pilersuineq ukioq manna ajornartorsiutaavoq.

Naalakkersuisut Ikerasammut Saattunullu aqagu ingerlaqqissapput.