Naalakkersuisut utaqqiisaagallartumik ineqartut
- Naalakkersuisut qinnutigaat Inatsisartut siulittaasuata illussaanik nutaamik pisinissamut 6 millionit koruunit aningaasaliissutigineqassasut. Naalakkersuisunut ilaasortat illuisa pisariaqartumik iluarsaannissaannut 2 millionit koruunit aningaaasaliisoqassasut, illunillu marlunnik aamma angivallaanngitsunik 5 millionit koruuninik aningaasaliisoqassasoq, tassaavoq Naalakkersuisut aningaasaqarnermut akileraartarnermullu ataatsimiititaliamut inassuteqarlutik siorna qinnutigisaat, ataatsimiititaliamit akuerineqartoq.
Ineqarnermut, Attaveqarnermut Angallannermullu Naalakkersusioqarfiup Naalakkersuisunut isertuussamik allagaani atuarneqarsinnaavoq Naalakkersuisut najugarfii sisamat najugaqarfigineqanngitsut tunineqartariaqarlutillu, isaterneqarlutik sanaqqinneqartariaqarlutillu.
- Naalakkersuisunut inissiat marluk Inatsisartullu siulittaasuannut inissiaq akeqanngitsumik najugaqarfiusoq maannakkorpiaq pisariaqartinneqarput. Inissiat 1-3 pisariaqartinneqavissortumik iluarsaanneqassapput. Inissiat qasserpiaat iluarsaanneqassagaluarnersut misissueqqaarnikkut aatsaat paasineqarsinnaassaaq, Naalakkersuisunut isertuussami allakkami maannakkut isertussaajunnaarsimasumi ilaatigut atuarneqarsinnaavoq.
