Naalakkersuisut urani assortuussutigaat

Uranip saniatigooralugu piiarneqarnissaa Atassummit tapersersorneqanngilaq.
decembarip 09-at 2008 07:08

Uranip saniatigooralugu piiarneqarnissaa Atassummit tapersersorneqanngitsoq, Atuagagdliutini ullumi saqqummersumi atuarneqarsinnaavoq. Taamaalillutik Narsami innuttaasut uranimik piiaanissamik akerliusut tapersersorneqalerput.

Narsap eqqaani Kuannersuarmi uranimik piianiartut Australiamiut suliffeqarfiat Greenland Minerals and Energy taamaasillutik piiaasinnaanissamut periarfissaat annikinnerulerput.

Siumup politikkikkut oqaaseqartartuata Lars-Emil Johansenip uran saniatigooralugu sinneruttunik piiaanissamik siunnersuutaa Naalakkersuisunit tamanit akuersaarneqassasoq ilimagineqaraluarpoq.

Urani piiarneqarsinnaasoq 55 milliardi koruuninik naleqassangatinneqaraluartoq Atassutip aningaasat kisimik inuunermi pingaaruteqannginnerarpai.

- Illoqarfiit inoqarfiillu eqqaanni uranimik piiaanissaq akerleraarput, Narsamilu innuttaasut pilersaarusiornermi peqataatinneqarsimannginnerat naammaginagu, Augusta Salling, Atassut sinnerlugu oqarpoq.