Naalakkersuisut: Uran pillugu innuttaasut tusaaneqassapput
- Tassunga atatillugu erseqqissassavarput Naalakkersuisut aalajangiisuulluinnartutut isigimmassuk aatsitassanik uranitalinnik misissuiffiit qanigisaanni najugallit pinngitsooratik sunniuteqaqataatinneqartarnissaat, naalakkersuisunut ilaasortaq Ove Karl Berthelsen oqalugiarnermini ilaatigut oqarpoq.
- Narsami innuttaasut tusarnaartoralugit urani pillugu oqallinneq ippassaq ingerlanneqarpoq, tassanilu uranimik akulinnik aatsitassarsiorsinnaanissamut akuersaartut illuatungiliuttullu peqataatinneqarput. Oqallinnermilu oqariartuuteqartut ilagaat naalakkersuisunut ilaasortaq Ove Karl Berthelsen, taassumalu urani pillugu naalakkersuinikkut anguniakkat saqqummiuppai.
- Sammisassamut pingaaruteqarluinnartumut, aatsitassanik uranitalinnut tunngatillugu misissuinissamut piiaanissamullu tunngasutut ittunut, innuttaasut isumasiorneqarnissaat Naalakkersuisut pingaartippaat, Naalakkersuisunut ilaasortaq Ove Karl Berthelsen aallarniinermini ilaatigut oqarpoq. Naalakkersuisoqatigiit uranimik akulinnik aatsitassarsiornissaq akuersaanngilluinnarlugu junip 24.-ianni oqariartuuteqarput, tamannalu aamma Ove Karl Berthelsenip suli atuuttoq Narsami oqallinnermi ippassaq oqariartuutigaa. Taamaattoq innuttaasut urani pillugu ammasumik oqalliseqataanissaat Naalakkersuinikkut pingaartinneqartoq saqqummerpoq.
- Tassunga atatillugu erseqqissassavarput Naalakkersuisut aalajangiisuulluinnartutut isigimmassuk aatsitassanik uranitalinnik misissuiffiit qanigisaanni najugallit pinngitsooratik sunniuteqaqataatinneqartarnissaat, Ove Karl Berthelsen oqarpoq.
Narsap eqqaani kuannersuarni aatsitassaq uranimik annertuumik akoqartoq paasineqareerpoq. Tassanilu aatsitassanik misissueqqissaarnerit suli ingerlanneqarput. Aatsitassanik uraninik annertuunik akulinnik piiaasinnaaneq imaluunniit piiaasinnaannginneq suli aalajangiivigineqanngilaq. Tamannalu siunissami suli aalajangiivigineqassanngitsoq, Naalakkersuisunut ilaasortaq Ove Karl Berthelsen oqarpoq. Aalajangiinissamullu atatillugu innuttaasut peqataanneqarumapput.
- Naalakkersuisut isumaqarput inuiaqatigiinnut pingaarutilimmi tassani aalajangiinissap tikikkiartuaarnerani, nunatsinni innuttaasut pimoorullugu peqataatinneqarnissaannut ukiut tulliuttut atortariaqarivut. Tamatuma kingunerisaanik 2009-mi 2010-milu nunatsinni sumiiffinni arlalippassuarni ataatsimiititsinernik ingerlatsisussaavunga, aamma erseqqissarusuppara piffissami qaninnerpaami aalajangiisoqarnavianngitsoq - tamanna arlaannaanilluunniit aarleqqutigineqassanngilaq, Ove Karl Berthelsen oqarpoq.
