Naalakkersuisut ullunut 100-nut siullernut pilersaarutaat

Suliniutit nukinginnartut, maannalu aallartinneqartariaqartutut nalilikkat saqqummiunneqarput, suliniutissatut siunniussat sukumiinerusumik nassuiarneqanngikkaluartut, suut pingaarnerunersut, Aleqa Hammondip ima nassuiaateqarfigai:

- Inuussutissarsiutitigut siuarsaanissamut pingaarnersiuivugut, suliffissaaleqinerullu ajornartorsiutiginerujussuata anigornissaanut tunngatillugu suliniutit aallartereersimasussat naammassereersimasussallu pillugit saqqummiussivugut, Naalakkersuisut siulittaasuat Aleqa Hammond oqarpoq.

Suliniutissatut siunniunneqartut pingaarnersiugaasut, Aleqa Hammondip erseqqissaatigaa, Naalakkersuisunullu ilaasortat ataasiakkaat suliassaqarfimminnut tunngasut pillugit itinerusumik kingusinnerusukkut saqqummiussinissaat neriorsuutigalugu.

Suliffissaaleqinerullu akiorniarneqarnissaa pingaarnertut taasariaqartoq, erseqqissaatigalugu:

- Inuiaqatigiit makillutik suliassaqannginnerat inuiattut ajornartorsiutigaarput. Nassuerutigineqartariaqarpoq naalakkersuinikkut suliassatut pingaarnersaammat innuttaasut sanarfeqataanissaat suliassaqarlutillu inuunissaat, aningaasarsioqataanissaallu qulakkiissallugu. Taannalu isumaqarpugut ajornartorsiut muminniarnissaanut nukiit tamaasa atorlugit sulinissatsinnut oqariartorpugut, Aleqa Hammond oqarpoq.

Saqqummiinerup aallartinnerani ilaatigut oqaatigivat suliniutigisassatut siunniussasi ullut 100-t ingerlaneranni naammassineqareersimanngikkunik aallartinneqareersimassasut, aningaasaliissutigineqartussat ukioq mannamut aningaasaliissutigineqareersut iluanni aaneqassasut. Imaappa arlaatigut sipaarniuteqartoqartariaqassasoq?

- Tamanna avaqqunneqarsinnaanngilaq. Sipaarniarfigisassavut sipaarniarfigissavavut, aningaasaliineruffigisassavullu aningaasalerniarsarissavavut. Sunniuteqanngitsumik aningaasatigut nikerartitsinissamut periarfissat ujartussavavut, ilassutitullu aningaasaliisoqassappat taanna periarfissatut kingullertut atorneqarsinnaavoq, Naalakkersuisut siulittaasuat oqarpoq.

Naalakkersuisoqatigiit isumaqatigiissutertik marsip ulluisa 26-anni atsioqatigiissutigaat, naalakkersuisunngortullu ulloq taanna aamma saqqummiunneqarlutik.

Naalakkersuisoqatigiit ukioq manna juulip ulluisa sisamaanni ullut 100-t naalakkersuisoqatigiissimassapput, suliniutissatullu ullumi siunniunneqartut ulloq taanna naammassineqareersimanngikkunik aallartinneqarsimassallutik.

Nunap immikkoortuini mittarfiliornissat, suliassatullu anguniakkat allat qineqqusaarnerup nalaani saqqummiunneqaqattaarput, taakkuali ullunut tulliuttunut 100-nut pilersaarummi ilaatinneqaratik, Naalakkersuisullu siulittaasuata tamanna nassuiaatissaqartippaa:

- Oqaaserpassuit qineqqusaarnerup nalaani anninneqarput, kisianni Naalakkersuisoqatigiit isumaqatigiissutaat uagut aallavigaarput, taassumalu tunngavissai. Aappaattullu, aningaasamut inatsimmi siuliani naalakkersuisuusimasut suliarisimasaanni sanaartugassanut aningaasaliisoqanngilaq, inatsillu taanna tunngavigaarput. Suliniutissat nutaat aallaaveqartissavavut aningaasanut inatsisissaq 2014-imoortoq saqqummiukkutsigu, Naalakkersuisut siulittaasuat Aleqa Hammond oqarpoq.