Assi: KNR / Andreas Wille

Naalakkersuisut: Ulluni tallimani angerlarsimanissaq pingasunngornermit piumasaqaataalersoq

Nunatsinnut angalasunut nutaanik malittarisassaqalerpoq. Tamanna nakorsaanerup Henrik L. Hansenip peqqissutsimullu naalakkersuisup, Anna Wangenheimip tusagassiortunik katersortitsinermi oqaatigaat.

Nunatsinnut angalanernut malittarisassat ullumi sukannernerulersinneqarput. Taamaalillutik angalasut Danmarkimi angalasimasut nunatsinnut tikinnerminni ulluni tallimani angerlarsimaannassapput ullullu tallimat qaangiunneranni misissorteqqissallutik. Malittarisassat aqagu pingasunngornermit atuutilissapput.

Taamaammat Danmarkimi kommunimit aappaluttumik nalunaarsorfiusimasumiissimaneq tassa tunillaassuuffiunerpaasumiissimaneq apeqqutaajunnaarpoq.

Angerlarsimaannarneq

Angerlarsimaannarninni pisuttuarsinnaavutit aamma najugaqatigisannut qanillisinnaavutit. 

Niuerniarsinnaavutit.

Allanut pulaassanngilatit, pulaartoqassanngilatit, bussissanngilatit, taxassanngilatit suliartussanallu.

Nunatsinnut tikinnermi ullut tallimat qaangiunneranni misissorteqqissaatit. Misissortinnerup tunillatsissimannginneq uppernarsarpagu suliartoqqissinnaavutit nalinginnaasumillu inuunerit ingerlateqqissinnaallugu.

Misissorteqqinnianngikkuit ulluni 14-ini angerlarsimaannassaatit aatsaallu ersiuteqanngikkuit suliartoqqillutit.

Malittarisassanik allannguinissaq sapaatip-akunnerata siulianili ilimagineqalereerpoq, atuutilernissaanulli politikkikkut akuerineqaqqaarnissaat amigaataasimalluni.

Tassa imaappoq malittarisassat upernaaq atuutereersut atulersinneqaqqipput. Taamaalilluni ulluni tallimani angerlarsimaannarnissaq inatsisitigut piumasaqaataalerpoq.

Danmarkimi coronavirusimik tunillaassuuttoqarneranik maannakkut aappassaaneerluni tunillaassuuttoqalernera angerlarsimaannarnissamut malittarisassat atulerseqqinneqarneranut pissutaavoq. Naalakkersuisoq, Anna Wangenheim taama oqarpoq.

Nunatsinnut angalasunut malittarisassat nutaat

Angerlarsimaannarnissamut malittarisassat saniatigut marlunnik allanik aamma aqagumiit malittarisassaqalerpoq. Peqqissutsimut naalakkersuisoq taama oqarpoq.

Angalasut tamarmik anersaartuutinut illersuuteqartoqassapput.

- Meeqqat 12-it inorlugit ukiullik timmisartumilu sulisut aamma Mittarfeqarfiit tunniussisarfiini sulisut anersaartuutinut illersuuteqassapput, peqqissutsimut naalakkersuisoq, Anna Wangenheim (D) oqarpoq.

Aamma angalasut tamarmik, ukiui apeqqutaatinnagit aallannginnerminni covid-19-imik tunillatsissimannginnermut uppernarsaateqassapput.

Assunga nalunaarummut ikaarsaariarnermut piffissaqassaaq, taamaammat meeqqat 12-it inorlugit ukioqartut 2020-mi oktobarip ulluisa arfineq-aappaanit aamma misissortittalissapput, naalakkersuisut tusagassiutinut nalunaarutaanni allassimavoq.

- Upernaaq ilikkagaqarfigilluarparput. Tassa meeqqat aamma tunillaassuinissamut aarlerinartorsiortitsisinnaasut. Napparsimarujussuarneq ajorput, kisianni aanaakkuminnut tunillaassuisinnaapput, nakorsaaneq oqarpoq.

Tunillatsittut tamarmik paasineqarneq ajortut

Nakorsaanerup Henrik L. Hansenip Danmarkimi tunillatsittoqassuseq pissutigalugu Danmark maanna nuna mattussaaffiulerpoq.

- Nunarsuaq tamakkerlugu covid-19-imik toqquteqartut maanna 1 millioniupput. Islandimi Danmarkimilu tunillaassuunneq annertungaatsialerpoq. Danmark maanna nunatut mattussiffittut taaneqarsinnaalerpoq.

Taassuma nunatsinnut angalaniartut Københavnimi misissortissimasut 11-t covid-19-imik tunillatsissimasut sapaatini akunnerni kingullerni paasineqarsimasut aamma oqaatigaa.

- Misissuisarnitsinni tassanga assersuutigalugu qulinit arfineq-marluinnaat maanna paasisinnaavagut.

Danmarkimit timmisartumut ilaasut 800-it missaanniittut sapaatip-akunneranut tikittarput, nakorsaaneq oqarpoq. Taamaammat tunillatsissimasumik tikittoqarsinnaanera ilimanarpoq.

- Taamaammat anguniakkamik anginerusumik angusaqarusulluta tassalu nunatsinni tunillatsissimasoqannginnissaa anguniarlugu nutaamik ajornakusoortumik maanna aaqqiissuteqarpugut.

- Kisianni maannakkutut tunillaassuuttoqarnera pissutigalugu tunillatsissimasumik isertoqaratarsinnaavoq, nakorsaaneq oqarpoq.

Illoqarfinnut nunaqarfinnullu angalaneq

Naalakkersuisut illoqarfinnut nunaqarfinnulluunniit angalasunut aamma sukateripput. Sumiiffiit assigiinngitsut illoqarfinnut nunaqarfimmullu angalanginnermi uninngavioqqaartussat allattorsimaffimmi atuarneqarsinnaapput. Apuuffigisassat allattorsimaffimmi ilaanngippat tikinninninngaanniit ullut tallimat qaangiunnera kingusinnerusukkulluunniit aatsaat misissorteqqaarlutit imaluunniit ulluni 14-ini sumiiffinni taakkunaneereeruit aatsaat apuuffissannut ingerlaqqissinnaavutit:

1) Avannaata Kommuniani:
a) Ilulissat

2) Kommune Qeqertalimmi:
a) Aasiaat
b) Qasigiannguit
c) Qeqertarsuaq

3) Qeqqata Kommuniani:
a) Kangerlussuaq
b) Maniitsoq
c) Sisimiut

4) Kommuneqarfik Sermersuumi:
a) Nuuk
b) Paamiut

5) Kommune Kujallermi:
a) Narsaq
b) Narsarsuaq
c) Qaqortoq

Covid-19-imik tunillatsissimannginneq aatsaat uppernarsarneqareerpat aatsaat angalasoqarsinnaavoq.

Isummersuutit

Coronavirusimik tunillatsinissaq pinaveersaaruk

Nunatsinni coronavirusi pillugu killiffik

  Misissorneqareersimasut 10353
  Tunillanneqarsimasut
17
  Peqqisseqqittutut nalunaarutigineqartut 16
  Napparsimavimmi uninngasut 0
  Anersaartuuteqartitaasut 0
  Toqquteqartut 0
Takuuk: nun.gl Nunatsinni Nakorsaaneqarfik
  Nutarterneqarpoq
  oktobarip 23-at 2020 nal. 10:45