Naalakkersuisut ullumi naqisimanartorsiortitaalerunartut
Aarrit nannullu pillugit Siumukkormiunit siunnersuutigineqarsimasut marluk aqagu Inatsisartuni oqallisigineqartussaapput. Siunnersuuteqartuupput Nikolaj Jeremiassen aamma Lars Mathæussen. Siunnersuutilli malinneqarunnanngillat, tamarmimmi nunat assigiinngitsut akornanni isumaqatigiissutinik unioqqutitsinerupput, aarrit, qilalukkat nannullu pillugit aalajangersakkanik.
Ingammik Lars Mathæussenip siunnersuutaa akerleriissutaasinnaavoq. Taanna siumukkormiunngorlaaq isumaqarpoq nannunut, aavernut qilalukkanullu qaqortanut qernertanullu killilersuutit atorunnaarsittariaqartut. Siunnersuutaali taamaallaat Qaanaamut, Illoqqortoormiunut, Tasiilamut taakkulu nunaqarfiinut atuuttussatut siunnersuutaavoq.
Finn Karlsenip Mathæusseni akereerpaa, uumasut taakku pikllugit nunarsuarmioqatigiit 1973-imi isumaqatigiissutaat eqquutsissagaanni akuerinissaat ajornakusuussasoq. Ajornannginnerulissanngilarlu Finn Karlsenip siuliata Karl Lyberthip, januarimi Ruslandimi nunat tamat ataatsimeersuarneranni isumaqatigiissut 1973-imeersoq atsioqqimmagu. Taamaattumik Lars Mathæussenip siunnersuutaa Finn Karlsenimit ilalerneqarnavianngilaq.
Siunnersuutip aappaa Nikolaj Jeremiassenimeerpoq, aarrit kitaani ukiukkut piniarneqartarnerisa allanngortinneqarnissaanik imalik.
Taanna aamma Finn Karlsenip itigartitsissutigisariaqassavaa, uumassusilerisummi innersuussutaannut akerliummat.
Ilisimannittoq Radioaviisimut oqaluttuarpoq naalakkersuisoq Finn Karlsen uani akunnattuungasoq. Siunnersuutit piniarnermut nunat assigiinngitsut akornanni isumaqatigiissutaannut akerleriiffiusinnaammata, amerlanerussuteqarunnanngillat, aammami Naalakkersuisut sakkortuumik eqqorneqarsinnaammata.
Nikolaj Jeremiassenip Lars mathæussenillu siunnersuutaat aqagu Inatsisartuni akuerineqanngitsoorpata, siunnersuuteqartut ima paamitsassinnaatigaat allaat upernaakkut ataatsimiinnermi aalajangiinissani Naalakkersuisunut amerlamerussuteqarnissaq ajornakusuulersinnaalluni.
Finn Karlsenimut naalakkersuisooqataanullu ajornerpaaffia uaniissinnaavoq, siunnersuuteqartut marluk Hans Enoksenip Partiminut nutaamut Naleqqamut nooriataartissinnaallugit.
Takujumaarparput siunnersuutigineqartut Inatsisartuni aqagu sisamanngornermi oqallisigineqalerpata qanoq pisoqarumaarnersoq.
