Naalakkersuisut: Ukiumut CO2 aniatinneqartoq 10 mio. tonsiussaaq

Nunat tamalaat CO2-mik aniatitsinerup millisinneqarnissaanik piumasaqaataat, Nunatta naammassisinnaanngilaa.
Allattoq Elisa Isaksen
maajip 18-at 2009 17:08

- Isumaqarpugut Naalakkersuisut erseqqarinngippallaamik aallaaveqarlutik aalajangersimasut. Siunnersuutigaammi ukiumut 10 million tonsit nalinginik C02-mik aniatitsinissamut noqqaassuteqarput.

Taama oqarpoq nunatsinni pinngortitamut avatangiisinullu suliniaqatigiiffiup Avatap siulittaasua Mikkel Myrup.

Ukiaru decemberimi Københavnimi silaannaap pissusaata allanngoriartornera pillugu ataatsimeersuartoqalerpat Kyotomi isumaqatigiissutip taartissaanik isumaqatigiinniartoqassaaq.

Namminersornerullutik Oqartussani avatangiisinut oqartussaasoq Stefen Ulrik Lynge oqarpoq isumaqatigiissummi allaqqasariaqartoq nunatta ukiumut 10 million ton C02 aniatissinnaasariaqaraa.

Naligaa kalaaleq ataaseq ukiumut 179 tons C02-mik aniatitsippat.

Tamatumunnga toqqammaviginiarneqarpoq nunatta suliffissuaqarnikkut ineriartussappat avaqqunneqarsinnaannginnera. Innuttaasut malinnaatinneqanngippallaarput.

Taamaammat orniginarnerooq naalakkersuisut avaqqullugit allaffimmik isumaginnittoqarfimmik pilersitsisoqarnissaa, pinngortitamut avatangiisinillu suliniaqatigiiffiup siulittaasua Mikkel Myrup kissaateqarpoq.