Naalakkersuisut tunumi qilalugartassat amerlinianngikkaat
Tunumi tamarmi qilalukkanik qenertanik pisassiissutit ukioq mannamoortut 40-upput taakkulu amerlineqalersaanngitsut, Inatsisartunut ilaasortap, Lars Poulsenip Siumumeersup Naalakkersuisunut apeqqutaata akissutaani allaqqavoq.
Taassuma pisassiissutit 50-it sinnerlugit ilaneqarnissaat pilersaarutaanersoq paaserusuppaa.
- Naalakkersuisut Tunumi qilalukkanik qernertanik pisassiissutit 50-inik amerlanerusunilluunniit amerlineqarnissaa pillugu nalunaaruteqarsinnaanngillat, piniarnermut naalakkersuisoq, Aqqaluaq B. Egede allappoq.
2022-mi affaannanngussasut
Naalakkersuisut maannamut pisassiissutit 2023-p tungaanut ikiliartuaartinneqarnissaannut pilersaarutip allanngortinnissaanut, uumassusilerituut tunumi qilalukkat qernertat pillugit nutaamik inassuteqaasiornikuunnginneri peqqutigalugit allanngortitsisinnaanngikkallartut, naalakkersuisoq aamma allappoq.
Tunu tamaat qilalukkanik qernertanik pisassiissutit ukiuni marlunni tullerni ukiumut qulinik ikilineqartarnissaat pilersaarutaavoq. Tassa imaappoq aappaagu 30-nissaat 2023-milu 20-nissaat pilersaarutaavoq.
