Naalakkersuisut tunuaqquai

Inatsisartut Kukkunersiuinermut Ataatsimiititaliaat nalunaarusiaq pillugu ippassaq ataatsimiiipput, ataatsimiititaliamilu siulittaasoq Godmand Rasmussen tamanna pillugu ima oqaaseqarpoq:

- Naalakkersuisumik Kim Kielsenimik apriilip 16-iani pisussamik aggersaagatta inerniliinivimmik naammassisaqanngilagut, eqqartukkatsinnut tunngatillugu nalornissuteqalaaratta. Nalunaarusiami inerniliunneqartut tunngavigalugit kinguneqartussaasoq avaqqussinnaanngilarput, Godmand Rasmussen oqarpoq.

Unioqqutitsilluni illunik tunisisoqartarsimanera tunngavigalugu naalakkersuisut tunuartariaqartut, Demokraatit sinnerlugit inatsisartunut ilaasortaq Jens B. Frederiksen oqarpoq, Godmand Rasmussenili tamanna pillugu ima oqarpoq:

- Ippassaq ataatsimiinnitsinni Jens B. Frederiksen erseqqilluinnartumik oqarpoq kinguneqartitsisoqarsinnaanngitsoq, isummanilu allanngortikkamiuk eqqarsarnartoqartippara. Suliaq suli ingerlasoq taamannak erseqqitsigisumik oqareertarneq ataatsimiititaliami siulittaasutut akuersaarsinnaanngilara. Jens B. Frederiksen inersimasuuvoq. Miluffittorunnaareerpoq. Inersimasutut pissusilersorniarli, Godmand Rasmussen oqarpoq.

Jens B. Frederiksen Godmand Rasmussenimut akissuteqarluni ima oqarpoq:

- Ataatsimiititaliami siulittaasoq paatsuuivoq. Arlaannik unioqqutitsisoqarsimappat, taava Demokraatit piumasarisarpaat kinguneqassasoq. Inersimarpalunnginneraaneq annertunerusumik oqaaseqafigerusunngilara, Godmand Rasmussenip tamanna nammineq akisussaaffigissavaa. Atassut nammineq ajortulioqataanikuunngilaq, paasisinnaanngilaralu nammineq tatiginassutsini eqqarsaatiginngikkaa, Demokraatit sinnerlugit Inatsisartunut ilaasortaq Jens B. Frederiksen oqarpoq.

Naalakkersuisuusimasut atorfilittallu pisortat illuutaannik akikinaarlugit pisisarsimanerata misissuiffigineqarnissaa inatsisartunit piumasaqaatigineqarpoq, eqqartuussisuserisullu taaguuteqartut Nuna Advokater nalunaarusiortuullutik.