Imigassamut inatsisip allanngortinneqarnissaanut siunnersuut Peqqissutsimut Naalakkersuisup, Mimi Karlsenip (IA) siunnersuutigaa.Assi: KNR

Naalakkersuisut tuniluuttoqarnerani imigassamik tuniniaanermik matusisinnaanngungajalersut

Naalakkersuisut nappaammik navianartumik tuniluuttoqarpat imigassamik matusisinnaanngungajalerput. Naalakkersuisuniimmi siunnersuut Inatsisartunit amerlanerussuteqartunit akuerineqarnissamut qanilliallappoq.

Imigassamut inatsimmut allannguinissamut siunnersuut akuerineqarsinnaanngungajalerpoq.

Inatsisartut siunnersuut Naalakkersuisut nappaammik tuniluutiasumik tuniluuttoqarneranut atatillugu imigassamik nioqquteqarnermik matusigallarsinnaanissaanut tunngasoq pingajussaanik suliarineqartussanngorlugu marlunngornermi nassiuppaat.

Siunnersuut Inatsisartuni sapaatip akunnerata tulliani pingasunngornermi naggataamik suliarineqassaaq. Siunnersuut Inuit Ataqatigiinnit, Naleqqamit, Siumumit Atassummiillu taperserneqarpoq.

Partii ataaseq kisimi akerliuvoq. Tassa Demokraatit.

AAMMA ATUARUK Demokraatit raser: Snart kan Naalakkersuisut - måske - helt selv stoppe for salg af alkohol

Kommunit ataasiakkaat coronap tuniluunnerata akiorniarnerata nalaani imigassamik piffissami matusisoqarnissaanut Naalakkersuisunut qinnuteqarput.

Siullermik 2020-mi marsimi pivoq. Nunatsinni kommuninit tallimanit sisamat ukioq manna januaarimi febraarimilu aamma taamaaliorput: Imigassanik sassaallernerit matuneqarput niuertarfiillu viininik, immiaaqqanik imigassanillu nioqquteqartarfii assersorneqarlutik.

Arriippallaartoq

Imigassamik nioqquteqarnerup matuneqarnera kommunit qinnuteqarneratigut tamatumalu kingorna Naalakkersuisut akuersineratigut aatsaat pisinnaavoq. Naalakkersuisulli imigassamik nioqquteqarnermik nammineerlutik siunissami matusisinnaalissapput.

Imigassaq pillugu inatsit

Inatsit una - inatsisissatut siunnersuut akuerineqasappat - Inatsisartut imigassaq pillugu inatsisaannut ilanngunneqarsinnaavoq:

"Nappaatit tunillaassortut akiorniarlugit iliuutsit pillugit Inatsisartut peqqussutaanni eqqaaneqartutut inuiaqatigiit nappaammut illersorneqarnissaasa pisariaqalernerata malitsigisaanik nunamut tamarmut ilaannaanulluunniit piffissamut aalajangersimasumut imigassanik aalakoornartortalinnik tuniniaanermut sassaalliinermullu killilersuineq utaqqiisaasumilluunniit inerteqquteqarneq pillugu malittarisassanik Naalakkersuisut aalajangersaasinnaapput.”

Kommunit imigassamik inerteqquteqarallarnissamut killiliinissamulluunniit ullumikkut nammineerlutik qinnuteqartarput. Tamatuma kingorna Naalakkersuisut akuersisarlutik.  

Siunnersuut siullermeerneqarmat Kirsten Fencker (Naleraq) peqqissutsimut suli naalakkersuisuuvoq. Taassuma coronap tuniluunnerata peqqinnissaqarfimmut arlaleriarluni ilungersuatitsinerani imigassamik matusiniarneq arriippallaartoq nassuiaatigaa.

- Iliuuseqapallattoqartariaqarneranik corona ilikkagaqarfigaarput. Taamaattumik naalakkersuisut tassunga piginnaaneqassapput, peqqinnissamut naalakkersuisoq, Kirsten Fencker (Naleraq) suliap Inatsisartuni sapaatip akunnerata siuliani suliarineqarnerani oqarpoq.

- Tamanna kommuninut upperinninnginnitsinnik isumaqanngilaq. Kommunit suli kissaateqarsinnaassallutillu Inatsisartunut siunnersuuteqarsinnaassapput.

Allatut oqaatigalugu: Kommunit namminneerlutik kissaateqartassagunik Naalakkersuisullu akuerseqqaarlutik tamatuma sukkanera naammanngilaq.

Kommunilli imigassamik matusinissamik namminneq suli qinnuteqarsinnaassapput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl