Naalakkersuisut: Takornariaqartitsinermut aningaasaliissutit amerlineqarput
Nunatsinni Takornariaqarnermut Siunnersuisoqatigiinnut Visit Greenlandimut aningaasaliissutit Naalakkersuisunit 12 procentinik ilanngaaviginiarneqarput, takornarialli umiarsuakkoorlutik Nunatsinnukartartut amerlinissaat anguniagaasoq aamma oqaatigaat.
Umiarsuit takornariartaatit Nunatsinnut tikittartut nutaamik akitsuusiiffigineqartalernissaat, Naalakkersuisut siunniuppaat, takornariat umiarsuarnut ilaasut amerlassusaat aallaaviginagu, umiarsuilli angissusaat aallaavigalugu akitsuusiisalernissaq siunniunneqarluni.
Akitsuut maannamut atuuttoq takornariamut ataatsimut tassaavoq 525 koruunit, taannalu 2008-mi atuutilerluni. Akitsuut taanna ilaatigut pissutaalluni takornariat umiarsuarmut ilaallutik Nunatsinnukartartut ikiliartuinnarsimapput. Akitsuut nutaaq atuutilerpat aningaasat Nunatta karsiata isertittagai aamma ikilissapput:
- 2010-miilli umiarsuarmik takornariartitsisartumik takornariat Kalaallit Nunaannukartut annertoorujussuarmik ikilisimapput. Umiarsuarmik takornariartitsisartumik ornigassanut allanut, soorlu Islandimut aamma Svalbardimut, piffissami tassani umiarsuarmik takornariartitsisartumik ilaasut amerliartorsimapput, Inuussutissarsiornermut Aatsitassanullu Naalakkersuisoq Jens-Erik Kirkegaard, tusagassiuutinut nalunaarummi ilaatigut allappoq.
Takornariartitsisarnermut ataatsimut katillugit aningaasaliissutinik Naalakkersuisut aappaagumut aningaasanut inatsisissatut siunnersuummi annikillissaaniarnerat ilumuunngitsoq, soorlu Radioaviisimi qanittukkut tamanna pillugu ilanngutassiatsinni oqartugut, oqaatigaat. Naalakkersuisummi paarlattuanik isumaqarput umiarsuarmik takornariartitsinermut akitsuutit annikillisinneqarnerat takornariaqartitsinermut aningaasaliinerusoq.
Tassunga atatillugu oqaatigisariaqarpoq takornariaqartitsinermut aningaasaliissutissat aappaagumoortut ikilineqassammata, kisianni soorlu Naalakkersuisut allattut:
- Siunnersuummi umiarsuarmik takornariartitsisarnermut suliassaqarfimmi akitsuutip unammillersinnaassuseqartumik annertussuseqalersillugu appartinneqarnissaa siunertaavoq, taamaaliornikkut ukiuni aggersuni umiarsuarmik takornariartartut amerlanerusut Kalaallit Nunaannukarumalersinniarneqarsinnaassallutik, Naalakkersuisut allapput.
Aningaasat pineqartut tassaapput 1,6 millionit koruunit. Aningaasat taakku kusanartulianik misigisassarsiortitsillunilu inuussutissarsiornermut nittarsaassinermut aningaasaliissutaasimasunut tunngapput.
Inuussutissarsiornermut Naalakkersuisoq Jens-Erik Kirkegaard ullumi oqaaseqartinniaraluaratsigu iluatsinngilarput.
