Illoqqortoormiuni piniartuuneq ukiuni kingullerni oqittuinnaanani akerlianik ajornarsiartuaarsimavoq. Silap allangoriartornerata tamatumunnga ilaatigut pissutaatinneqarpoq.
Puisit amiisa tunisaaneranni isertitat annikilliartorsimapput, ingammik Qaqortumi ammeriviup piumasaqaataasa allanngorsimaneratigut. Illoqqortoormiuni Pilersuisup pisortaa Erling Madsen taama nassuiaavoq:-Illoqqortoormiuni piniartut puisit amiinik panertunik tuniniaanermik inuussuteqarput. Qaqortumi ammerivik isumaqatigiinniarnermini oqariartuutigivaa puisit amii panertut killilimmik tigusalerniarlugit, Erling Madsen nassuiaavoq.
Oqaatigaattaaq Pilersuisup isertitai ukiuni kingullerni annertusiartornatik annikilliartorsimammata, iluaraluguli Islandimi takornariaqartitsinermik suliallit Illoqqortoormiuni piniartunit annerusumik suleqatigilerniarlugit siunnerfeqarmata. Erling Madsenillu iluaraattaaq naalakkersuisut Tunumi inuussutissarsiutitigut ineriartortitsinissaq siunertaralugu sisamanngormat innuttaasunik ataatsimiititsimmata.
Ineqarnermut naalakkersuisoq Jens Napaattooq, kiisalu aalisarnermut piniarnermullu naalakkersuisoq Rasmus Frederiksen ulluni makkunani Tunumiipput, ataasinngornerullu unnukkuani Tasiilami innuttaasunik ataatsimiititsissapput.
