Naalakkersuisut suliffissaaleqineq annikillisarniarpaat
Aningaasat taakku nuna tamakkerlugu sulisussarsiornermi atugassamik nittartagaliornissamut, Piareersarfinni inissat amerlineqarnissaannut, inuiaqatigiinni sanngiinnerpaatut inissisimasutut taaneqartartut piginnaanngorsaqqinnissaannut aamma nunaqarfinni isorliunerusunilu inuussutissarsiornikkut suliffeqarnikkullu immikkut ittumik aningaasaliinissamut ilaatigut atorneqassapput.
-Suliassanik aallartinneqarsinnaasunik ujaasinitsinni aningaasanik sanaartornermut aserfallatsaaliinermullu aningaasaateqarfimmi tigusinnaasatsinnik nassaarpugut, Inuussutissarsiornermut, Ataatsitassaqarnermut Suliffeqarnermullu Naalakkersuisoq Jens-Erik Kierkegaad nassuiaavoq.
Suliniutit pilersaarutaasut naammassineqanngitsoornerisigut sanaartornermut iluarsaassinermullu aningaasaateqarfimmi aningaasat uninngasut amerliartuaarsimasut Naalakkersuisoq oqarpoq, taakkulu misissuiffigineqartariaqarnerarlugit.
Nutarterinermik sanaartugassanillu suliassat immikkut ittut suliffissanik pilersitsissapput
Sanaartornermut aserfallatsaaliinermullu ukiumut 700 million koruunit tungaannut aningaasaliissutigineqartarput, suliassalli ilaat ukiumi pineqartumi angumerineqanngitsooraangata imaluunnit allamik peqquteqartumik suliarineqanngitsooraangata aningaasat atunngitsuukkat aningaasaateqarfimmut nakkartinneqartarput.
Suliassat unikaallassimasut illuatungaanilu pisortat suliffissaaqinerup akiorniarnerani sanaartortitserusukkaluartut Naalakkersuisup arajutsisimanngilai.
Ullumikkulli periutsit malillugit suut siorna angumerineqarsimanersut sorliillu ukioq manna angumerineqarsinnaassanersut kiisalu aningaasaateqarfimmit suut ukioq manna aallartinneqarsinnaanersut takujuminaattarnerarpai.
Jens-Erik Kierkegaard isumaqarpoq periuseq ullumikkut atorneqartoq eqarpallaaqimmat allanngortinniarlugu misissorneqartariaqartoq, suliniutit aningaasanut inatsimmiittut piviusunngortinneqartalernissaat qulakkeerniarlugu.
-Ukiumit ukiumut aningaasaliissutigineqartartut akornanni qassit sulisinneqartarnersut imaluunnit atorneqartarnersut misissuiffigisariaqarparput, qanoq ingerlasoqarnera nakkutigalugulu takusinnaanngorniassagatsigu, Inuussutissarsiornermut, Ataatsitassaqarnermut Suliffeqarnermullu Naalakkersuisoq Jens-Erik Kierkegaard oqarpoq.
