Naalakkersuisut suliassanik nunap avataanut tunniussipput
Piffissami annertuumik suliffissaaleqiffiusumi praktikkerfissaaleqinerlu aatsaat taama annertutigitillugu, Naalakkersuisut sanaartugassat immikkoortunngorlugit suliarimannittussarsiuunnagit ataatsimoortumik suliariumannittussarsiuussinerat eqqumiiginarsinnaavoq. Immikkoortunngorlugimmi suliariumannittussarsiuussisoqarneratigut kalaallit suliffeqarfii arlallit neqerooruteqarsinnaanissaat periarfissinneqassaaq, ataatsimoortumimmi suliariumannittussarsiuussineq suliffeqarfissuarnuunerusoq saaffiginnittuuvoq, taakkulu Nunatsinni amerlavallaanngillat.
Ataatsimoortumik suliariumannittussarsiuussisoqassappat sulisartut sanaartornermi sulisussat amerlanerpaartaat avataaneersuunissaat qularnanngilaq. Tamannalu suliffissat praktikkerfissallu, minnerunngitsumillu nunatta aningaasaqarnera eqqarsaatigalugit Nunatsinnut iluaqutissartaqanngilaq. Nusukamit naalakkersuisut suliariumannittussarsiuusseriaatsip eqqarsaatigeqqinnissaanut ilungersortumik kaammattorusuppagut, Nunatsinni suliffeqarfinnut inuiaqatigiinnullu sapinngisamik pitsaanerpaamik iluaqutaasussanngorlugu, Gerth Lynge, Nusukap siulittaasua oqarpoq.
Nusukap Qinngutsinni inissiat 81-it sanaartorneqarnissaat immikkoortunut annikinnerusunut suliariumannittussarsiuunneqarnissaat kaammattuutigaa, soorlu ass. 30 + 30 + 21 atorlugu. Taamaaliornikkut kalaallit suliffeqarfii nunaqavissunik sulisoqartut neqerooruteqarnissaminnut periarfissinneqassapput. Nunatsinni suliffissaqartitsiniarnermut nukittorsaataassaaq, praktikkerfissanullu tunngatillugu ajornartorsiummut aamma iluaqutaassalluni.
-Taamaaliornikkummi suliaqarfinni tamani entreprenørit amerlasuut suliassaqartinneqalissapput, qularnanngitsumillu aamma suliffissanik praktikkerfissanillu amerlasuunik pilersitsisoqarsinnaassalluni. Naalakkersuisut siulittaasuata ukiortaami oqalugiaateqarnermini sapinngisamik amerlanerpaanut suliassanik pilersitsoqarnissaanik oqaaseqarnerminik timitaliilluni inissiat pineqartut suliariumannittussarsiuunneqarnissaannik allanngortitseqataasinnaassasoq neriuutigaarput, Gerth Lynge naqissusiivoq.
