Naalakkersuisut suleqatigiinneranik naliliisitsineq
Tamanna pillugu siullertut aperaarput Demokraatit Inatsisartunut ilaasortaatitaa, Niels Thomsen. Taanna ima akivoq:
- Ataatsimiititaliarsuit arlallit suleqatigiissitaliallu allat ukiuni kingullerni marlunni sulisinneqarsimapput, taakkulu innersuussutaat assigiinngitsut isummerfigisussaavagut, neriuppungalu Inuit Ataqatigiit suleqatigiumaaraatigut Nunatta allanngortinnissaanut suliniuteqarnitsinni, Niels Thomsen oqarpoq. Taasuma naqissuserpaa, Inuit Ataqatigiit Inatsisartuni ilaasortaatitaasa ilaannik suleqateqarneq ajunngitsuusoq, naak partiit suliniutaat assigiinngikkaluartut.
Politikkikkut siunniussat assigiinngitsuuneri pissutigalugit, ukiuni kingullerni marlunni suliniutit ingerlanneqarsimasut inernerisa tamanna takussutissaqartikkaa, Demokraatinut ilaasortaq Palle Christiansen isumaqarpoq:
- Partiit pingasut assigiinngitsut suleqatigiinneranni soorunami politikkikkut suliniuteqarnermi pingaartitat assigiinngitsumik paasineqartarput. Eqqarsaatigineqaannarsinnaapput ukiuni marlunni kingullerni suliat pingaarutillit suliarineranni politikkikkut eqqarsartariaatsit tunngavigalugit suliniartoqartarmat. Soorunalimi ilaanni siunniussat uniorneqarsimappata maleruutiinnarnissaq pisariaqartarpoq , Palle Christiansen oqarpoq, nangillunilu oqaatigaa isumaqatigiikkallarneq ilaanni pisariaqartartoq:
- Partiit assigiinngitsut pingasut suleqatigiinnerat sorlaqarluartumik manna tikillugu inerneqarpoq, neriuutigiinnassavaralu ukiuni tulliuttuni marlunni aamma taamatut ingerlajumaarluta, Palle Christiansen oqarpoq.
Suleqatigiinnermi isumaqatigiissinnaaneq ajunnginnerpaaq angussagaanni eqqarsartaatsit tamalikaartussaasartut, Demokraatit siulittaasuata, Jens B. Frederiksenip oqaatigaa.
Taavami Demokraatit eqqarsartaasertik uniorneqaraajat maleruutiinnartarsimappat?
- Uagut sumi inissisimanerput ilisimavarput. Uagut peqataanngikkutta suleqatigiit amerlanerussuteqarsinnaanngillat. Illuatungaanili ilisimavarput Inatsisartunut qinigaagatta sisamaannarnik isertitaqaratta. Neriutigiinnassavarpulli ukiuni tulliuttuni marlunni suleqatigiinneq pitsaasoq aamma ingerlaqqissasoq, Jens B. Frederiksen akivoq.
Qinersinermi kingullermi 2009-mi pisumi, Inuit Ataqatigiit qinersisartut 43,7 procentiinit qinerneqarput. Demokraatit qinersisartut12,9 procentiinit taaneqarput. Kattusseqatigiit Partiiaat qinersisartut 3,8 procentinit qinerneqarlutik.
Ilisimaneqartutut Kattusseqatigiit Partiiata siulittaasua, Anthon Frederiksen Naalakkersuisunut aamma ilaavoq. Taassuma oqaatigaa, partiini mikisunnguugaluarluni suleqatigiinnermi pingaaruteqarsimasoq.
Inuit Ataqatigiit ataatsimeersuarneranni Danmarkimi partiip, SF-ip siulittaasuata, Villy Søvndal-ip, partiit assigiinngitsut suleqatigiinneranni iluaqutit ajoqutaasinnaasullu oqalugiaatigeqqammerpaa.
