Naalakkersuisut siulittaasuata najuuppiartannginnera illuatungiliuttunit isorineqarpoq

Naalakkersuisut siulittaasuat Kuupik Kleist, inatsisartut ataatsimiinnerat septembarip ulluisa 25-iannili aallartimmat Inatsisartuni oqallinnerni peqataasoq ataasiaannarlutik takusimallugu Malik Berthelsen Finn Karlsenilu allapput. - Ilaanneeriarluni ataatsimiittarfimmut puttuttarpoq, kinguninnguali aneqqittarluni, taamaattumik paaserusupparput sooq oqallinnerni peqataaneq ajortoq, gruppini siulittaasut allapput.

Taakkua tikkuarpaat naalakkersuisunut ilaasortat allat illoqarfimmiikkaangamik oqallinnerni piffissami sivikinnerusumi sivisunerusumiluunniit peqataasarmata tamannalu pissusissamisoorluinnartuunerarlugu. - Tupigusuutigisorujussuuvarput naalakkersuisut siulittaasuat inuiaqatigiinnut taamak pingaaruteqartigisunik inatsisartuni oqallinnerni malinnaanngimmat, taamaasillunilu suut oqallisigineqarnersut sianigisaqarfiginagit, Malik Berthelsen aamma Finn Karlsen allapput. Kuupik Kleistili oqallinnernut malinnaavoq Kuupik Kleist sermitsiaq.gl imut taamatut oqarpoq.

- Mannali tikillugu suliassaqarfiit uanga akisussaaffeqarfikka ikittuinnaat oqallisigineqarput. Taamaattumillu oqallinnerit amerlanerpaartaat allaffinnit malinnaaffigisarpakka, Kuupik Kleist aviisip sermitsiap nittartaataani taamatut issuarneqarpoq. Kuupik Kleistip erseqqissaatigaa ullut tamaasa inatsisartut ataatsimiittarfiannut orniguttarluni. Oqalliseriaatsilli nutaap eqqunneqarnerata kingorna killeqartorujussuuvoq naalakkersuisunut ilaasortat, suliassamut toqqaannartumik attuumassuteqanngitsut, qanoq akulerussinnaatiginerat, Kuupik Kleist oqarpoq. Tamatuma saniatigut tikkuarpaa Malik Berthelsenip Finn Karlsenilluunniit aalajangissanngikkaat sumiissanerluni qanorlu sivisutigisumik.