Naalakkersuisut siulittaasuata issittumi sakkutuulersortoqarnissaa naatsorsuutiginngilaa
Naalakkersuisut siulittaaasuat Kuupik Kleist FE-p Danmarkimi Illersornissamut qullersaqarfiup nalunaarusiaani navianartorsiulernissamik naliliinera pillugu taama oqarpoq. Ruslandip Danmarkillu akornanni qalasersuaq pillugu aaqqiagiinngittoqalissagaluarpat, USA aamma Canada pinngitsooratik ilanngunneqassammata navianartorsiortoqalernissaa Kuupik Kleistip ilimaginngilaa. Nunat tamat akornanni isumaqatigiissutit naapertuuttumik malinneqarnissaat naatsorsuutigigamigit.
- Nunarsuarmioqatigiit akornanni isumaqatigiissutit naapertorlugit tamakkua eqqartorneqartarnissaat neriuutigaara. USA minillugu nunat tamat akornani isumaqatigiissuteqartoqarpoq, taakkualu pisussaaffigivaat pissutsit eqqartussallugit. Eqqartueqatigiiffiusussani nunat tamalaat akornanni aaqqissuussani tamakku pisussaapput, Kuupik Kleist oqarpoq. Qalasersuarmi siku aappat aqqutit nutaat siunissami atorneqalersussaapput. Tassungalu atatillugu nakkutilliineq isumaqatigiinnikkut aaqqissuunneqarnissaa, Kuupik Kleistip naatsorsuutigaa.
- Uagut ukiorpaalunni kissaatigisarsimavarput naalagaaffiit nunallu issittumut attuumassuteqartut qaninnerusumik suleqatigiissasut, issittumi suliassat assigiinngitsut eqqarsaatigalugit. Aamma nakkutilliinissat, aammalu issittumi avatagiisip mianerineqarnissaa, killeqarfinnik nakkutilliinerit assigiinngitsullu allat inuiaqatigiinnut naliginnaasumik tunngassuteqartut suleqatigiissutigineqarnissaat kissaatigivarput, Kuupik Kleist oqarpoq. Pisuussutit nassaarineqarumaartussat isumaqatigiissutit tunngavigalugit agguarneqarnissaat, Kuupik Kleistip naatsorsuutigaa.
- Naalagaaffiit Peqatigiit ataani immat pillugit isumaqatigiissut taanna naapertorlugu aalajangersimasumik malittarisassaqarpoq, nunatat imartallu qanoq annertugisumik naalagaaffimmut sorlermut pigitinneqarsinnaanersut. Taannalu naapertorlugu agguaassisoqarnissaa kissaatiginartippara. Kuupik Kleistip issittumi sakkutuulersortoqalernissaanut apeqqummut atatillugu oqaatsit atorneqartut mianersuunneqartariaqarnerarpai, pisariaqanngitsumik aaqqiagiinnginnerit pinngitsoortinniarlugit.
