Naalakkersuisut siulittaasuata aningaasaleerusunnginnera paasiuminaatsippaa

- Qisuariaatigisara tassaavoq, naalakkersuisut siulittaasuata avammut nalunaaruteqarnermini marloriarluni oqaatigigamiuk, Ikaarsaariarnermi ataatsimiititaliat aningaasarsianut tunngasut nammineerlutik aalajangersorsinnaagaat. Kisianni taamaannginnami, taakkorpiaat inatsimmik tunngaveqarluni aamma naalakkersuisut nalunaarutaannik tunngaveqarluni aalajangersarneqareermata. Taannaana inuiaqatigiinnut erseqqissassallugu pingaaruteqartorujussuartut isigigiga. Tassa inatsit malillugu ingerlavugut aamma ilaasortat akissarsiassaannut tunngatillugu.

- Soorunami naatsorsuutigivarput, malittarisassat kingusinnerpaamik januaarip aallaqqaataanit naalakkersuisunit naapertuuttunngorsarneqassasut.

Ikaarsaariarnermi ataatsimiititaliami aggustip aallaqqaataani ataatsimiilerutta missingersuut aappassaaneerlugu suliarissavarput akueralugulu.

Aningaasaliissutissat annerit qinikkat aningaasarsiaannut, angalanerinut, unnuisarnissaannut aamma allaffissornikkut aaqqissuusseqqinnissamut immikkoortitaqassaagut aamma politikkikkut aqutseriaatsip nutaamik ilusilersornissaanut sulinissatsinnut immikkoortitsivugut kiisalu innuttaasunut paasissutissiiuarnissaq pingaartikkatsigu aamma tassunga aningaasaliinissamik immikkoortitsinissamut siunnersuuteqarpugut.

- Maajimi naalakkersuisut siulittaasuat kommunit kattussuunnissaannut suliassat pillugit ataatsimeeqatigaarput, neriorsorneqarpugullu aggersarneqaqqikkumaarluta.

- Oqaloqatigiinnerit taamaattut illersorpakka, pitsaasuummata, tusagassiorfitsigut naveersinerit politikkikkut aqqutissaasorinnginnakkit. Taamaattumik qilanaarlunga naalakkersuisut siulittaasuata aggersaanissaa utaqqivara, Asii Chemnitz Narup naggasiivoq.