Naalakkersuisut siulittaasuat tunuaqquaat

Ungarnip illoqarfiisa pingaarnersaanni Budapestimi inatsisartut ataatsimiittarfiata silataani akerliussutsimik takutitsisoqarmat 100-t sinnerlugit ikilerneqarput. Naalakkersuisut siulittaasuat upernaaq qinersisoqarmat salluliorsimasutut pasillugu akerliussutsimik takutitsisut Ferenc Gyurczany tunuaqquaat. Tunuarniuteqarusunngilarli.

Ungarnimiut 10.000-t missaat unnuaq Budapestip aqquserngini akerliussutsimik takutitsipput. Suut tamarmik ajorteruttorfianni isiginnaarut aallakaatitsiunnaavippoq. Taamaalimmat politiit illoqarfinni minnerusuni najugallit illoqarfiit pingaarnersaanukartinneqarput. Akerliussutsimik takutitsisut akullartinniarlugit gassit qulliliornartortallit tungaannut milorujussuunneqarlutillu imermik serpartaasoqarpoq. Akerliussutsimik takutitsisut ullaap tungaa iluatsittumik akullartinneqarput Budapestimilu eqqissisoqaqqippoq. Akerliussutsimik takutitsissut Ungarnimi naalakkersuisut siulittaasuata tunuarniuteqarnissaa kissaatigaat. Partiimi ilaasortat upernassaq ataatsimiinneranni immiussat tusagassiorfinnit assigiinngitsunit saqqummiussornerisa kingorna Ungarnimi naalakkersuisut siulittaasuat ataatsimeeqataasimalluni salluliorniarlunilu pilersaarusioqataasimalluni qanittukkut oqaluttuarpoq.

Ungarnimi aningaasaqarneq ajoruttormat aningaasartuutinik appaasoqarsinnaannginnerata nalaani inatsisartunut qineqqusaarnermi akileraarutit appartinneqarnissaat qineqqusaarutigisimallugu naalakkersuisut siulittaasuat nassuerpoq. Ungarnimi aningaasat nalikitsuararsuupput, allaat EU-mi nalikinnerpaallutik. Maannalu EU-p Ungarn sukatereqqusarpaa.

Massakkut Ungarnimi naalakkersuisut sukaterileruttormata naalakkersuisut siulittaasuat tunuarniuteqarusunngilaq. Taamaatut aalajangerneq naalakkersuisoqataanit tapersersorneqarpoq illuatungiliuttunilli akerlerineqarluni. Ungarnimi præsidenti oqarpoq naalakkersuisut siulittaasuata tunuarumannginnerata kingunerisaanik tamat oqartussaaqataanerat tunngavigalugu nalaakkersueriaaseq innutaasunik tatigineerukkiartortoq. Taamaammallu utoqqatseqqusisimavoq, tamannali naammassanersoq qularnarpoq naalakkersuisummi siulittaasuat tunuarpat aatsaat uninniarlutik innuttaasut nalunaaruteqartarput.