Naalakkersuisut siulittaasuat: Siuariartorpugut
Tamatta oqalliseqataajuartariaqarpugut, naalakkersuinikkut oqartussaasut eqqortunik aalajangiisarnissaannut ikiorsinnaaniassagatsigit, Naalakkersuisut siulittaasuat oqarpoq.
- Tamavitta pisinnaasarput naapertorlugu arlaatigut peqataasariaqarpugut. Aningaasarsiornikkut pissutsit najummatsernartut aqqusaarpavut naammattusaariniarnerlu imaannaanngilaq. Immitsinnulli eqqaasittuassaagut pinngitsoorata meeqqat utoqqaallu inuunerminni atugarissaartinnissaat akissaqarfigiuartariaqaratsigu, Kuupik Kleist oqarpoq.
Aningaasarsiornikkut pissutsit najummatsernaraluartut, siuariartornerput, Naalakkersuisut siulittaasuata maluginiarpaa. Aalisakkat qaleruallillu avammut tunisat ukiup kingulliup ingerlanerani malunnaatilimmik amerlisimapput. Tassa avammut tunisanit isertitat 376 millionit koruunit nalinginik amerlisimammata. Tunisat 2010-mut naleqqiullugu 25 procentit missaannik amerlisimapput:
- Kisitsisit tamakku tutsuiginartut pisortatigoortullu tunngavigalugit aalisarneq pillugu oqallinneq maanna torernerusumik ingerlanneqartariaqarpoq, Kuupik Kleist oqarpoq.
Suliffissat amerlineqarnissaat, sinerissami illunik inissianillu sanaartortitsinerit amerlanerusut, ilinniartullu praktikkertullu amerlanerusut pillugit sulissutigineqarnissaat pillugu kommunit qanimut suleqatigineqassasut, Naalakkersuisut siulittaasuata aamma oqaatigaa, inuiaqatigiittullu aaqqissuussaanitta allanngortikkiartornera 2012-imi nanginneqassaaq:
- Periusitoqqanik sungiutiinnarsimasanik allannguinissamut sapiissuseqartariaqarpugut, taamaaliortariaqarpugullu uagutsinnuinnaq pinnata. Soraarnerussutisiaqartarnermi aaqqissuusseqqinnissaq pisariaqarpoq, amerlanerusut utoqqalinissaminnut namminneq ileqqaaruteqartalernissaat siunertaralugu. Taamatullu ineqarnermut tapiissutaasartut annerusumik pisariaqartitsisunut tutsinneqartalernissaat anguneqartariaqarpoq. Innaallagissamut, imermut, kiassarnermut assartuussinermullu assigiimmik akeqartitsisimanerup atorunnaarsinneqarneraniit ukiut qulinngorneranni nalileeqqinnissaq pisariaqarpoq, Naalakkersuisut siulittaasuat oqarpoq, allannguinissallu pillugit isumaqatigiinniarfigisassat aggersarlugit.
