Naalakkersuisut siulittaasuat: Piffissaliussamik sivitsuisoqassanngilaq

Aaqqisuussaanermut ataatsimiititaliap kommunit kattussuunnissaat pillugu pilersaarusiaa naalakkersuisunut ukiaru tunniunneqassaaq. Tamannali siusippallaartoq, pilersaarusiorluarnissalu eqqarsaatigalugu sivitsuisoqartariaqaraluartoq kommuneqarfiit kattuffiata KANUKOKA-p aallartitanik sapaatip-akunnerani kingullermi ataatsimiisitsinerani kommunit arlallit siunnersuutigaat. Sivitsuinissamilli isumaliuteqarnatik, naalakkersuisut siulittaasuat Hans Enoksen maanna erseqqissaavoq.

- Massakkumut pilersaaruteqanngilavut, akerlianilli oqallinnissap annertuumik ingerlanneqarnissaa kaammattuutigerusupparput. Killiffik aatsaat tamaanikkut tikikkutsigu qanoq ingerlariaqqissanerluta paasinarsissaaq. Hans Enoksen oqarpoq.

kattussuussinerup kingunerisassai pillugit kommunit arlallit sukumiisumik misissuisitserusullutik oqariartuuteqartarsimapput. Tamanna pillugu naalakkersuisut siulittaasuat akivoq, kommunit namminneq ukiorpassuanngortuni ingerlatsisuunerminni aningaasartuutit qaffasippallaarnerarlugit oqariartuuteqartarsimasut.

- Marloqiusumik ingerlatsinerit qimanneqarnissaat kissaatigaat, allaallu kommunit aalajangigassaat Namminersornerullutik Oqartussanit

tigummineqarnerat oqariartuutigineqartarluni. Taamaattumik isumaqarpunga, kommunit kissaataat annertuumik maanna timitalerniarneqalertoq, tamannalu kommunit atorluartariaqaraluarpaat. Hans Enoksen oqarpoq.

Pipallatamik aaqqiiniartoqarsinnaanera ernummatigineqarsinnaanerluni ?

- Ukiorpassuarni aaqqiiniarnerit namminneq oqariartuutigiuagaat kiisami timitalerniarneqalermata pipallatamik oqartoqassappat tamatsinnut ilungersunartorujussuussaaq. Oqareernittut piffissaliussamik kinguartitsinissaq siunnerfiginngikkallarparput. Naalakkersuisut siulittaasuat erseqqissaavoq.

Aamma oqarpoq, kommunit pilersaarutit malillugit ukioq 2009-mi malunnaatilimmik allanngortiterifigalugit aallartinneqareersimassasut.