Naalakkersuisut siulittaasuat nipangersimajuarsinnarpoq

Angallannerup tungaatigut ukiortaamit allanngortiterinissamik siunniussaqarnertik pillugu naalakkersuisut siulittaasuat Hans Enoksen oqaaseqarsinnaanngikkallarnerarpoq.

Arctic Umiaq Linemut isumaqatigiissut ukiortaamit taamaatinneqarpoq, tamatuma kingunerisaanik timmisartukkut angallassineq annertusarniarneqarluni.

Tamanna pillugu isornartorsiuinerit maanna imaaginnavipput, ilaatigut Arctic Umiaq Linemi sulisut 120-t ukiortaamit siunissartik naluaat, innuttaasut ikinngeqisut tusagassiutitigut tutsiuttarput timmisartukkut angalanissamik akissaqarnatik, maannalu Arctic Umiaq Linep illoqarfiit akilersinnaasumik ingerlatsiffiusinnaasut kisiisa angallassiffigissanerlugit isumaliutigileruttorpaa. Tamakkuli tamaasa maannamut oqaaseqarfigisinnaanngikkallarlugit naalakkersuisut siulittaasuat oqarpoq.

- Arctic Umiaq Linep siulersuisui immikkut ittumik ataatsimiittussaapput, taakkulu aalajangertinnagit oqaaseqarsinnaanngikkallarpunga. Aamma suli nalunarpoq, suliffeqarfik atorunnaarsinneqassanersoq imaluunnit allatut ilusilerlugu ingerlanniarneqassanersoq. Hans Enoksen erseqqissaavoq.

Arctic Umiaq Linep immikkut ittumik ataatsimeersuartitsinissaa pillugu suli ulluliisoqanngilaq.