Naalakkersuisut siulittaasuat kamappoq
Naalakkersuisuni ilaasortaq Josef Motzfeldt nunatta puisit amiinik Canadameersunik pisissaarneranut akerliunini pillugu naalakkersuisut siulittaasuannit inissinneqartussanngorpoq.
- Naalakkersuisut suli ilisimatinneqanngitsulluunniit Aningaasanut Naalakkersuisup Josef Motzfeldtip
taama saqqummiussinera paasisinnaanngilluinnarpara.
Josef Motzfeldt taama oqaaseqarnissamut Naalakkersuisunit immikkut pisinnaatinneqangilaq, tamannalu pillugu naalakkersisut nalunaaqutaq qulingiluanut ataatsimiigiaqquakka, taama oqarpoq Naalakkersuisut siulittaasuat Hans Enoksen. Naalakkersuisut siulittaasuata Naalakkersuisunik nalunaaqutaq qulingiluanut ataatsimiigiaqqusinera tunngaveqarpoq Aningaasanut Naalakkersuisup Josef Motzfeldtip nunatta puisit amiinik pisissaarnera pillugu ippassaq unnukkut Qanoruumi akerliliineranik. Josef Motzfeldt ippassaq oqarpoq nunarput puisit amiinik Canadameersunik pisissarmat Nunavumi piniartut eqqugaasussanngortut.
- Naalakkersuisut ataasiakkaarluta oqaaseqartalissagaluarutta naalakkersuisut sulinerat taava sumut killeqalissava? Hans Enoksen Josef Motzfeldtip oqaaseqarnera pillugu taama apeqqusiivoq.
Naalakkersuisut siulittaasuat erseqqissaavoq nunarput puisit amiinik Canadameersunik pisissaarmat, Nunavumi piniartut eqqorneqanngivissut, ukioq 2002-mi natsiit 1500-it kiisalu 2003-mi aataat 1350-it amii Nunavumit taamallaat pisiarineqarsimammata.
Nunavut naalakkersuisuni siulittaasuat avatangiisinullu naalakkersuisoq maanna nunatsinniipput nunatta puisit amiinik Canadameersunik pisissaarnera pillugu naalakkersuisunik oqaloqatiginnikkiartorlutik. Taakku naalakkersuisutsinnit ullaap tungaani aqqanermut ataatsimeeqatigineqassapput.
