Naalakkersuisut siulittaasuat angalangaatsiassaaq

Ineriartornermut ministerertaaq, Søren Pind, ippasaani ataatsimeeqatigaa, Danmarkimi ineriartorneq pillugu politikkimut nutaamut atatillugu nunap inuiinut Danmarkip iliuusissarisinnaasai ilaatigut eqqartorneqarlutik. Naalakkersuisut siulittaasuata Søren Pind Kalaallit Nunaannut aamma tikeraarsarpaa.

Kuupik Kleist ippassarli Bruxellesimiilerpoq, aqagu aatsaat aallaqqissalluni, nunat qeqertallu imarpik ikaarlugu tikinneqarsinnaasut, OLT-imik taaneqartartut, ukiumoortumik ataatsimiinneranni peqataalluni. OLT-mut nunarsuaq tamakkerlugu ilaasortaapput nunat nunasiaasimasut, Kalaallit Nunaat aamma ilaasortaalluni. Aningaasarsiorneq ineriartortitsinerlu pillugit nunat OLT-mut ilaasortat tamakku EU suleqatigaat.

Kuupik Kleist ataasinngorpat Canadaliassaaq, nunanut allanut ministerit ataatsimiinnissaanni, "Arctic 5"-imik aamma taaneqartartumi, Canadap ukioq manna aaqqissuisuuffigisaani peqataajartorluni. Nunat tallimat Qalasersuup eqqaaniittut, tassa Kalaallit Nunaat - taamaalilluni aamma Danmark - Norge, Rusland, Canada aamma USA "Arctic 5"-imi ataatsimeeqataasarput.

Ataatsimiinneq Ottawap qanittuani pisussaavoq, Ilulissani 2008-mi maajip qaammataani ataatsiminnerup nanginneralugu. "Ilulissat Deklaration"-imik taaneqartartoq taamani isumaqatigiissutigineqarlunilu atsiorneqarpoq.