Naalakkersuisut Sermersuup sipaarniarnera isornartorsiorpaat

Ilinniartitaaneq sipaarniarfigineqarmat Nick Nielsen mianersoqqusivoq. Borgmesterili isumaqarpoq ilisimasaqarani eqqartuiniarsarisoq.
februaarip 11-at 2014 11:53

Kommuneqarfik Sermersuup aningaasaqarnini iluatsinniarlugu ilinniartitaanerup tungaatigut 9,5 millioner koruunit sipaarniutiginiarpai.

Sipaarniarnerup ilaatigut kingunerissavaa, meeqqat atuarfiini ilinniartitsisut ilinniaqqittarnerat ukiuni aggersuni unitsikkallartariaqarlugit. Kommunili isumaqanngilaq ileqqaarnerit atuartitsinermut sunniuteqarnerlussasut.

Tamannali Ilinniartitaanermut Naalakkersuisup Nick Nielsenip upperivallaanngilaa.

Taanna isumaqarpoq ilinniartitsineq maannakkut ajunngitsumik ineriartortinneqartoq. Ineriartorneq taanna ingerlateqissagutsigu meeqqat atuarfiini atuartitsinermi pitsaassuseq ajornerulersissanngikkipput.

Taamaattumik Nick Nielsen tusagassiutinut nalunaarummi erseqqissaavoq Kommuneqarfik Sermersuup meeqqat atuarfia sipaarniarfigigamiuk kukkusoq.

Naalakkersuisoq isumaqanngilaq meeqqat atuarfiat pitsaassutsimik qaffatitsinissamik pisariaqartitsisoq sipaarfigissallugu eqqortuusoq, taamaammat kommunit sipaarfiusinnaasunik allanik naleqqunnerusunillu missingersuutiminni ujartuisariaqartut.

Kommuneqarfik Sermersuulli borgmesteriata allaffiani Asii Chemnitz Narupip Naalakkersuisup nalunaarutaa tupigusuutigaa. Minnerunngitsumik sipaarniutit pisariaqarsimammata Naalakkersuisut Sermersuup aningaasassaanik kommuninut allanut agguaasimammata.

- Soorunami uissuumminngitsuunngilanga kommuneqarfipput sinnerlugu ilisimasaqarpalaartumik oqariartornissaq oqittuararsoorpasimmat, uanga apeqqummi taama pingaaruteqartigisumi tusagassiutit aqqutigalugit oqalliseqataarusunngilanga. Nick Nielsen Kommuneqarfik Sermersuup ataatsimiittarfianut aggersarniarpara, borgmester Asii Chemnitz Narup oqarpoq nangillunilu:

- Taamaattumik aningaasaqarnermut ataatsimiititaq sisamanngorpat ataatsimiilerpat aggersarniarpara, kissaatigigakku issiaqatigiilluta uagut sukumiisumik paasissutissiisinnaassasugut, taamaalilluni Naalakkersuisup ilisimasaqarnerulernissaa aamma kommuneqarfitsinni atuarfeqarnermut tunngatillugu angusinnaassagatsigu.