Naalakkersuisut sanaartortut pipallatanik sanaartortoqartarneranik akiueqataaqqugaat
Morten Gosvigip pikkorissartitsisarnerit isornartorsiorpai, oqarluni nunaqavissunik siunnersuisinnasunik tamakku ingerlanneqarneq ajormata, oqarlunilu ilinniartitsisussat, Danmarkimiit teknikerinik ingerlanneqartarnissaat, Statens Byggeforksningsinstitutimit aamma Dansk Byggecentrummimit taamaallaat aalajangerneqartarmata tamanna pissusissamisuunngitsoq.
Masanti: Ilaserineqarsimasariaqaraluarpugut
Tamanna pillugu Ineqarnermut Naalakkersuisup akissuteqarnermini oqaatigaa, sanaartornermi sannarlutarpassuit taamaatinneqassappata, sanaartornermik suliaqartut piumassuseqarnerusariaqartut aaqqiissutissanillu ujarleqataallutik.
- Sanaartortunik ilinniartitseqqiisarnerit pikkorissaanerillu nunaqavissunit piumasarineqartoq malillugu suliaq pilersaarusiugaavoq. Taamaaliornissamik pilersaarusiortoqalermat, Nunatsinni sanaartornermik suliaqartut amerlasuut apersorneqarput, suut qanorlu sanaartoriaatsit Nunatsinni atorneqartut ilisimasaqarfigineqarnersut, Siverth K. Heilmann naqissusiivoq.
Ineqarnermut Naalakkersuisoqarfiup, Aalborg Universitetimi Statens Byggeforskningsinstitut-i, SBi immikkut ilisimasaqarnera tunngavigalugu, siunnersuinissaq pillugu suleqatigiinnissamut taanna isumaqatigiissuteqarfigaa. SBi-p sanaartornermi ilisimatusarnikkut piginnaasaqarnera Nunatsinnilu piginngisatsinnik ilisimasaqrnera pissutigalugu, Ineqarnermut Naalakkersuisoqarfiup, SBi suliassanik suliakkerneqarnissaa pissusissamisoorsoraa. Kingusinnerusukkullu paasinarsivoq, SBi nammineerluni pikkorissarnissanik suliaqalereersimasoq, tamannalu iluatigalugu nukiit ataatsimoorunneqarsinnaaneri siunertarineqalerluni.
- Namminersorlutik Oqartussat sanatitsisutut, sanaartukkani nutaanerusuni arlalinni suliat pitsaassusiini ajornartorsiutinik akuersaarneqarsinnaanngilluinnartunik naammattugaqartarnerat ilumoorpoq. Taamaalilluni kukkunerit amigaatinillu, amerlanerpaatigut sanaartornermik aqutsinermi sumiginnaanernik peqquteqartsinneqartariaqartunik, iluarsiiniarnermut inuiaqatigiit piffissarujussuarmik atuisinneqartarput aningaasarpassuarnillu akiliisinneqartarlutik. Tamannalu sanaartornermik nakkutilliisumit, pisortanit sanatitsisunit suliassanik isumaginnittussatut atorfinitsinneqarsimasumit arlaleriarluni toqqaannartumik nassuerutigineqarsimavoq, Ineqarnermut Naalakkersuisoq, Siverth K. Heilmann allappoq.
