Naalakkersuisut sakkutuunik Syrialiartitsinissaq pillugu ilisimatinneqarsimanngillat
Danskit Syriami sorsunnermut akuliunnissaat Folketingip nunanut allanut ataatsimiititaliaanni amerlanerussuteqartut tallimanngormat ullaakkut aalajangerpaat.
Taamatulli aalajangernermut Naalakkersuisut peqataatinneqanngillat. Nunanut allanut tunngasunut naalakkersuisoq, Vittus Qujaukitsoq KNR-imut taama allappoq.
- Danskit naalakkersuisuisa siunnersuuteqarnerannut tunuliaqutaasunut ilisimatinneqarpunga(...). Danskit sakkutuuisa sorsugiartitaanissaannut Nunatta tusarneqarnissaa tunngaviusumik kissaatigigaluarpara. Kisianni namminersorneq pillugu isumaqatigiissummi erseqqissumik allaqqavoq, illersornissamut politikki Danmarkip naalagaaffeqatigiit sinnerlugit ingerlakkaa, Vittus Qujaukitsoq allappoq.
Aamma atuaruk Inatsisartut Lagtingilu sorsunnissamik aalajangernermut tusagaqarsimanngillat
Inatsisartut nunanut allanut sillimaniarnermullu ataatsimiititaliaat ilisimatissimavaa, danskilli sorsunnermut tapiissuteqarnissaat pillugu allamik oqaasissaqarnani, Vittus Qujaukitsoq allappoq.
Danskit sorsugiarpata naalagaaffeqatigiinni ilaasortanut sunniuteqassasoq, nunanut allanut sillimaniarnermullu ataatsimiititaliami siulittaasup tulliata, Sara Olsvigip tallimanngormat oqaatigaa.
Aamma Savalimmiormiut aalajangernermut peqataatinneqannginnerat Savalimmiut Folketingimi ilaasortaatitaat, Sjurdur Skaalep isornartorsiorpaa.
ISIL-ulli akiuunneq tapersersorlugu, Skaalep tallimanngormat KNR-mut oqaatigaa.
Aamma atuaruk Danmark sakkutuunik Syrialiartitsilersoq