Illersornissaqarfimmi kalaallit ilinnialersinnaasut ikilissangatinneqarput. Sakkutuujusussaatitaanermummi ilinniarnissaq Naalakkersuisunit pingaartinneqanngilaq.Assi: Forsvaret

Naalakkersuisut sakkutuujusussaatitaanermut ilinnialerusuttunut tapiissuteqanngitsut

Naalakkersuisut kalaallit inuusuttortaanut sakkutuujusussaatitaanermut ilinnialernissamut tapiissuteqarusunngitsut.

Naalakkersuisut inuusuttut Illersornissaqarfimmut Kalaallit Nunaanni misilitsissinnaanerat unitsippaat.

Tassa kalaallit inuusuttortai sakkutuujusussaatitaanermut misilitsinniarunik Danmarkiliaqqaartariaqassapput.

Taamaattorli Danmarkimi inuusuttut misilitsissagunik angalanissanut akisoqisumut Naalakkersuisut tapiissuteqassanngillat. Tamanna ilinniartitaanermut naalakkersuisoqarfimmiit, Demokratineersumut Anna Wangenheimimut, paragraf 37-mi akissummi erserpoq:

- Tamanna tunngavigalugu paasissutissiisoqarpoq (...) sakkutuujussaatitaaneq ilinniagaqarnersiutit pillugit malittarisassanut ilaatinneqanngitsoq, apeqqummut akissutigineqarpoq.

Sakkutuujusussaatitaanermut ilinniagaqarneq Kalaallit Nunaannut iluaqutaanngitsoq

Namminersorlutik Oqartussat kalaallit inuusuttortaanut sakkutuujusussaatitaanermut ilinnialerusuttunut aningaasatigut tapiissuteqartarnikuupput. Illersornissaqarfilli Kalaallit Nunaanni sumiiffinni sakkutuujusussaatitaanermut ilinnialernissamut, inuusuttut najugarisartik qimanngikkaluarlugu, ilinniarlernissamut misilitsitsisoqartalermat taanna tapiisarneq unitsinneqarpoq. 

Illersornissaqarfik naapertorlugu, sakkutuujusussaatitaanermut ilinniarlernissamut sumiiffinni 2018-miit 2019-mut misilitsitsinerni, tassani sakkutuujusussaatitaanermut ilinnialernissamut kalaallit inuusuttut 37-t akuerisaasimapput.

AAMMA ATUARUK Naalakkersuisut sakkutuujusussaatitaanermut misilitsittarnerit unitsikkaat

Tamanna ilinniarnivittut isigineqanngimmat, sakkutuujusussaatitaanermut ilinniarlernissamut ilinnialerusuttunut, Naalakkersuisut tapeerusunngillat.

Ilinniartitaanermut naalakkersuisoqarfik KNR-mut ima allappoq: ”Inuusuttut Illersornissaqarfimmi inuussutissarsiornikkut ilinniagaqalersinnaanissaat Naalakkersuisunit kissaatigineqarpoq.”. Taamaattorli "nunatsinni akuersissuteqartunik sulilersinnaasunut kisimi pilersuisinnaasunut" illersornissami ilinniarfiit taamaallaat taperneqarsinnaasut.

Sakkutuujusussaatitaanermummi ilinniagaqarneq taamatut Naalakkersuisunit nalilerneqanngilaq.

Naalakkersuisut nunarput piitsunngorsaraa

Sakkutuujusussaatitaanermut ilinniarlernissamut Naalakkersuisuninngaaniit ajornakusoornerulersitsineq, kalaallit inuusuttortaasa sakkutuunngorniartartut ikinneruleratarsinnaanerat, Anna Wangenheimip aaleraa: 

- Inuusuttorpaaluit ilinniariartunngitsoortorpassuusasut isumaqarpunga, taanna oqarpoq.

AAMMA ATUARUK Julie Broberg Aasianni illersornissaqarfimmut misilitsippoq

Kalaallit Nunaata siunissami namminersulivinnissaanut piginnaatitsilersinnaasunik Naalakkersuisut unitsitsinerat nunatsinnut piitsunngorsaataassasoq, Anna Wangenheim aamma isumaqarpoq. 

Ataatsimiititaliaq: Inuusuttunut nassuiaasariaqarpusi

Sakkutuujusussaatitaanermut ilinniarlerusuttunut qanoq iliorsinnaanermik, sumiiffinni misilitsissinnaanernut tapiissutinullu tunngasunut Naalakkersuisut aalajangiinerat paatsiveerutitsingaatiarpoq.

Naalakkersuisut nassuiaateqarnissaanik Inatsisartuni nunanut allanut sillimaniarnermullu ataatsimiititaliamiit piumasarineqarpoq: 

- Naalakkersuisut inuusuttunut nassuiaasariaqartut ataatsimiititaliamiit isumaqarpugut, Nunanut Allanut Sillimaniarnermullu Ataatsimiititaliami siulittaasoq, Sofia Geisler, allappoq.

Ataatsimiititaliamiit taamatut piumasaqartoqaraluartoq, Naalakkersuisunit oqaaseqartoqanngilaq.

Una apeqqutaaginnalerpoq, inuusuttunut ajornaatsumik ilinniaqqissinnaanermut ingerlariaqqiffiusoq, sooruna Naalakkersuisunit unitsinneqarnissaanut aalajangertoqarsimasoq?

Tamanna KNR-imit qaamaterpaalunni, Nunanut allanut naalakkersuisumut Pele Brobergimut,  akineqanngitsumik apeqqutigineqartarsimagaluarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat