Naalakkersuisut sajuppillatsinneqaqqissanerpat
Naalakkersooqatigiit ingerlaannassapput, soorluliuna sivisunaassanngikkaat.
Februaarip ulluisa tallimaanni naalakkersuisooqatigiit aalaterneqarput. Uumasunik Illersuiniaqatigiit Canadami puisinniat amiilaarnartumik toqoraaneranni assilisat saqqummiuppaat. Aqaguani Naalakkersuisut Canadamit puisit amiinik piseqqusiunnaarput. Atassutilli siulittaasuata Finn Karlsenip ingerlaannaq atuutilersumik eqqusseqqusiunnaarnermik taavaa.
IA isumaqataanngilaq. Naalakkersuisooqatigiit imaalivaat: Ammeriviup Great Greenlandip, Namminersornerullutik Oqartussanit pigineqartup, Canadamit puisit amiinik pisisarnini unitsissagaa.
Februaarip 21-iani Finn Karlsen saqqummiussivoq Great Greenlandip ingerlanneqarnera misissuiffigeqqullugu – pisortallu Michael Nielsenip tunuarallarnissaa kissaatigalugu. Naalakkersuisut siulittaasuata Hans Enoksenip akueriumanngilaa.
Ammerivimmili sulisuusimasut ilaata saqqummiummagu Great Greenlandimik aqutsineq ajorluinnartoq, Finn Karlsen-ip Atassutillu Ammerivimmik misissusoqarnissaanik piumasartik pivaat; misissuinerli allatut ingerlanneqarsimavoq.
Ukiaanerani inatsisartut katersuunnerini Isumaginninermut naalakkersuisup Asii Chemnitz Narupip aningaasanik atuivallaarsimanera tunngavigalugu illuatungiliuttut Asii C. Narup tunuartinniarlugu tatiginninnginnermik taasisitsipput – Atassullu illiinissaminut eqqarsarpoq. Naalakkersuisooqatigiinnerli ingerlaannarpoq.
Akunnerup uuma ingerlanerani kukkunersiuisoqatigiit attaveqanngitsut marluk Ammeriviup ingerlanneqarnerani ippigisassaqaratik nalunaarusiorput – naalakkersuisullu tusaatissatut tiguaat.
Finn Karlsenilli nalunaarutigaa Ammeriviup aningaasatigut aqunneqarnera misissuiffigeqqusimanagu, aqunneqarneraliuna sukumiisumik misissuiffigeqqusimagini. Taamaasimmat Finn Karlsenip utoqqatsernissaa piumasaalerpoq…..tusakkallu sinneri tusareerpasi…
Naggasiineq:
Aqagu Itisiliinermi naalakkersuinikkut ullumimut pissutsit sammineqassapput. Pissanganerli tassunga killeqarunanngilaq. Marlunngorpaamiimmi kommunit aaqqissuuteqqinnissaat oqaluserineqarluni aallartinneqassaaq; ilisimaneqalereerporlu naalakkersuisooqatigiit apeqqummi isumaqatigiinngitsut.
