Naalakkersuisut saattuartassiissutit utertinneqarnissaannut ammapput
KNAPK-p siulittaasortaava Peter Olsen neriorsuivoq, EU-mut saattuartassiissutigineqartut 1000 tonsit nunatsinnut utertinneqarnissaat sulissutiginiarini. Peter Olsenip tunngavilersuutigaa sinerissap qanittuani assagiarsunniartut pisassaat maannakkut killiliiffigineqarnikuummata, amigalerlutillu.
Saatuat nunatsinnut utertinneqarnissaat KNAPK aqqutigalugu EU-mut isumaqatigiinniarnissani tullerni tamanna siunnersuutiginiarini Peter Olsen oqarpoq.
- Aalisarnermut pingaaruteqarluinnarpoq. Soorlu Sisimiuni ukioq manna 500 tonsit pisasiissutaapput, taakkulu nungukkaluarpata sinerissami assagiarsunniartut pisassaaruttussaapput.
Aalisarnermut naalakkersuisoq Rasmus Frederiksen oqarpoq EU-p saattuartassaaasa nunatsinnut utertinneqarsinnaanissaat naalakkersuisunit ammaffigineqartoq:
- Saattuat EU-mut tunisartakkagut 1000 tonsit isumaqatigiissutip iluaniimmata, tassa ukioq mannamut aappaagumullu atuuttussamik aalajangersaareertoqarnikuuvoq, tassa 1000 tonsit EU-p aningaasaliissutigisartagaasa iluani inissisimassasut aalajangerneqareerpoq.
EU-mut saattuartassiissutit ikisinneqarnissaannut naalakkersuisut ammasut Rasmus Frederiksen oqarpoq.
- Isumaqatigiissutip nutarsarnissaanut piareersarnerit aallartisaleruttorput, taakku maajip arfernaniit qulinguluaat ilanngullugu Ilulissani ingerlanneqassallutik. Tassani allannguutissanik siunnersuuteqartoqassappat sooruna politikkikkut anguniagassutut siunniunneqarsinnaapput.
Rasmus Frederiksen oqarpoq pisassiissutit EU-p pisariumassanngippagitmisisu9isoqarsinnaassasoq, soorlu siorna 1000 tonsiniit 700 tonsit sinerissap qanittuani aalisartunut tunniunneqarsimasut.
EU-ip saattuartassai ikilineqarsinnaappata taakku kalaallit sinerissami aalisartuinut tunniunneqarsinnaanissaat Rasmus Frederiksen-ip qularinnginnerarpaa.
EU-imut isumaqatigiissut naapertorlugu nunarput Eu-mut pingasunik pisassiisussaavoq. Pisassiissutit kitaani raajaratassanik 4.000 tonsinik, Tunumi raajartassanik 5.675 tonsinik kitaanilu saattuartassanik 1000 tonsinik imaqarput. Pisassiissutit EU-mut 320 mio. kr-inik naleqarput.
