Naalakkersuisut saattuarniarnermut aalisartunut nutaanut akuersissuteqarnavianngitsut
Naalakkersuisut saattuat pillugit aqutsinissamut pilersaarut nutaaq januaarip ulluisa tallimaanni akuersissutigaat.
Aqutsinissamut pilersaarut nutaaq naapertorlugu aqutsiveqarfinnik nutaanik marlunnik pilersitsisoqarpoq, pilersaarullu naapertorlugu aalisartut nutaat akuersissutinik tunineqassanngillat.
- Inuussutissarsiutigalugu aalisartunut nutaanut saattuarniarnissamut akuersissutinik ukiuni tulliuttuni marlunni januaarip aallaqqaataanit 2021-mit decembarip 31-annut 2022-mut tunniussisoqassanngilaq
Naalakkersuisut tusagassiuutinut nalunaarummi allapput.
Sooq saattuarniarnissamut nutaanut akuersissuteqartoqannginnissaa pillugu aalisarnermut, piniarnermut nunalerinermullu Naalakkersuisoqarfik KNR-imit oqaaseqartinniaraluarparput. Tamannali tallimanngornermi iluatsissimanngilaq.
Aamma aqutsiveqarfiit marluk avinnerisigut nutaanik aqutsiveqarfeqalerpoq.
Aqutsiveqarfik Sisimiut marlunnut avinneqarpoq aamma aqutsiveqarfik Nuuk-Paamiut marlunnut avinneqarluni. Taakku avataaniillutillu sinerissap qanittuaniipput.
- Aqutsiveqarfiit allat allannguuteqassanngillat. Taamaalilluni assagiarsunnut aqutsiveqarfiit arfineq pingasuulerput, Naalakkersuisut allapput.
Aqutsiveqarfinni taakkunani marlunni januaarimiit decembarimut nangittumik aalisarnermut taamaallaat akuersissuteqartoqarsinnaavoq.
Aalisariutinut 75 BRT/120BT-mit minnerusut taamaallaat akuersissuteqartoqarsinnaavoq.
Aalisarnermut atortunut piumasaqaatit nutaat
Aqutsinissamut pilersaarummi aalisarnermut atatillugu atortorissaarutit aalajangersimasut atorneqarnissaannut aamma piumasaqaateqalerpoq.
- Aamma piumasaqaatigineqarpoq atortoq escape window, allunaasaasoq arrorsinnaasoq pullatinut nermunneqarsimassasoq.
- Isumaqatigiissutigineqarpoq piumasaqaatigineqartoq ukioq ataaseq ikaarsaarfittut atorneqassasoq, aalisartunit aalisaataalersoq ukioq manna naleqqussarfigineqassaaq, Naalakkersuisut allapput.
Pullatit immap naqqani qaleriaarlugit pineqarnissaat inerteqqutaassaaq.
Saattuarniarnermut allanik maleruagassiisoqanngilaq.
Aajuku aqutsiveqarfinnut pisassiissutigineqartut:
Saattuat
Upernavik |
191 tons |
Qeqertarsuup Tunua – Uummannaq |
576 tons |
Sisimiut, sinerissap qanittuani |
483 tons |
Sisimiut, avataani |
68 tons |
Maniitsoq |
37 tons |
Nuuk-Paamiut, sinerissap qanittuani |
806 tons |
Nuuk-Paamiut, avataani |
214 tons |
Qaqortoq-Narsaq |
260 tons |
Saattuat katillugit |
2.635 tons |