Naalakkersuisut saarullitassiinerat eqqarsarnartoqartikkaa

Naalakkersuisut aalisartunut aalisariutaateqanngitsunut saarullittassiinerat siornalu pisassiissutigineqartunit pingasoriaammik amerlatigisumik pisaassiinerat Ane Hansen-ip (IA), inatsisartuni aalisarnermut ataatsimiititaliami ilaasortaasup, eqqarsarnartoqartippaa.
Allattoq Jaaku Lyberth
apriilip 20-at 2008 17:20

- Siornatigut nalunngilarput naalakkersuisut pisissassiissutinik itigartitsisartut, naak aalisartut aalisariuteqaraluartut akuersissutigineqarnissamullu piumasaqaatit pigigaluaraat, Ane Hansen oqarpoq.

Saarullit aalisarneqarnissaannut akuersissutigineqartut siornamut naleqqiullugit pingasoriaammik amerlineqarput, tamanna aamma Ane Hansen-ip eqqarsarnartoqartippaa. Raajat ikileriarneratigut saarulliillu amerleriarnissaat biologinit suli qulakkeerneqarsimanngimmat, ilumut saarulliit amerleriaqqissanersut pillugu pisassiissutigineqartut pingasoriaammik amerlineqarnerat eqqarsarnartoqartippaa.

Suut tunngavigalugit naalakkersuisut saarullittassanik akuersillutik tunniusisimanersut Ane Hansenip naalakkersuisunut apeqqutiginiarpai. Aalisariutaateqanngitsut tons-inik amerlasuunik tunillugit aalisariutaatillillu nunamut tulaassuisinnaasut ikinnerusunik saarullittassinneqarnerat pillugu Ane Hansen naalakkersuisunut apeqquteqaateqarniarpoq.

Inatsisartut upernaakkut ataatsimiinnerat marlunngorpat aallartissaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq