Naalakkersuisut qinnuteqaataat Aningaasaqarnermut Ataatsimiititaliap suliaraa
Suliffissanik pilersitsinissamut atatillugu Naalakkersuisut pilersaarusiorsimapput, ilaatigut internetikkut nuna tamakkerlugu sulisussarsiortarfik pilersinniarneqarpoq, Piareersarfimmi aallartittartut amerlisinniarneqarput, sanngiinnerusutut taaneqartartut ilinniaqqissinnaanerannut periarfissaat amerlisinniarneqarput kiisalu nunaqarfinni isorliunerusunilu immikkut ittumik inuussutissarsiutitigut suliffissaqartitsiniarnikkullu suliniutinut aningaasaliissutit amerlisinniarneqarlutik.
Katillugit 174,2 million koruunit Naalakkersuisut Aningaasaqarnermut Ataatsimiititaliamut qinnutigaat. Qinnuteqaat ullaap tungaani oqaluuserisimallugu Aningaasaqarnermut Ataatsimiititaliap siulittaasua Siumumeersoq Jens Immanuelsen oqarpoq:
-Erseqqissaatigissavara ataatsimiititaliami annerusumik assortuussuteqannginnatta, apeqqutinilli Naalakkersuisunut utertitsivugut. Kommuunit matumani suliniarnermi akuutinneqarnissaat pingaartutut isigineqarmat apeqquteqaateqarpugut, kommuunit oqaaseqaataat tusareerlugu suliaq inaarutaasumik apriilip 25-ani suliarissavarput.
Suliffissanik pilersitsiniarnermut atatillugu 174,2 million koruunit qinnuteqaatigineqarput, aningaasat tamarmik Sanaartornermut Aserfallatsaaliinermullu Aningaasaateqarfimmit tiguneqassanersut Inatsisartuni ilaasortat ilaannit apeqquserneqartalereeraluartoq Inuussutissarsiornermut Naalakkersuisoq Jens-Erik Kierkegaard oqarpoq suliaq suli ingerlammat tigusiffigineqartussatut siunniunneqartut taagorsinnaanagit, Aningaasaateqarfilli kisimi tigusiffigineqassanngitsoq.
-Aningaasat qinnuteqaatigisatta nalinginut tigusiffigisinnaasatsinnik assigiinngitsunik misissuisimavugut, ilai Aningaasaateqarfimmit illikartitsinerupput ilaallu allaninngaanneerlutik. Taamaalillugu naammassigallarnikuuarput, Aningaasaqarnermullu Ataatsimiititaliamit akuerineqassanersoq paasiumaarparput, Jens-Erik Kierkegaard taama oqarpoq.
