2007-2008-mut qilalukkanik qaqortanik qernertanillu pisassiissutinik agguaaneq
Naalakkersuisut Kitaani qilalukkanik qaqortanik qernertanillu pisassiissutissanik aalajangersaapput. Pisassiissutissanik aalajangersaaneq nunani tamalaani isumaqatigiissutit, uumassusilerinikkut siunnersuineq, atuisut ilisimasaat kiisalu Piniarneq pillugu Siunnersuisoqatigiit tusarniaaffigineqarnerat eqqarsaatigalugit pivoq.
Pisassiissutissatut akuerineqartut Naalakkersuisup qernertanik qilalugarniarnerup allanngortinneqannginnissaanik kissaateqarnerata kiisalu Piniarneq pillugu Siunnersuisoqatigiit kaammattuutigisaasa akornanni naapilluni aalajangersarne-qarput. Taamaalilluni qilalukkat qernertat 300-t qilalukkallu qaqortat 165-it pisassiissutissatut akuerineqarput. Aalisarnermut, Piniarnermut Nunalerinermullu Naalakkersuisup nalunaarummi § 3 tunngavigalugu kiisalu Piniarneq pillugu Siunnersuisoqatigiinnut tusarniaareernerup kingorna Naalakkersuisut soqutigisarsiunngitsumik agguaariaaseqarneq tunuliaqutaralugu pisassiissutissatut aalajangiiffigisaat agguaappai.
Agguaariaatsimi pineqarpoq uumasoqatigiinnut taaneqartunut pisassiissutinit tamarmiusunit kommuninut tamanut agguaanneqartariaqartunit kisitsisitaliilluni amerlassusiliineq. Amerlassusiliussat piffissami 1993-2003-mi Piniarnermit pisat pillugit kisitsisitigut paasissutissat tunuliaqutaralugit aalajangersarneqarput. Aammattaaq ukiuni pisassiissuteqarfiusuni siullerni pingasuni pisassiissutinik agguaaneq kiisalu pisassiissutigineqartunit pisarineqartut ilanngullugit tunngavigineqarput.
Qaanaap kommunianut pisassiissuteqartarnermi immikkut malittarisassaqarnera pissutigalugu kommunimut tassunga qilalukkanik qaqortanik qernertanillu pisassiissutissat agguaariaaseq malinnagu aalajangersarneqarput. Taamatuttaaq Qimusseriarsuarmi qilalukkanut qernertanut immikkut agguaariaasiliortoqar-simavoq. Taamaaliornikkut pisassiissutinik agguaanermi isorliunerusunut attuumassuteqartunut immikkut iliortoqarnera peqataaffigineqarpoq.
Tamannarpiartaaq pissutigalugu oqaluttuarisaanermi paasissutissanik misissuinermi kommuninut 20BRT/15BT-init oqimaannerusunik nalunaarut atuuttoq naapertorlugu qilalukkanik qaqortanik qernertanillu piniarnermi atoqqusaanngitsunik angallaterpassualinnut pisassiissutit ikilisinneqarput. Taamatuttaaq kommuninut inuussutissarsiutigalugu piniartorpassualinnut kommuninullu isorliunerusutut attuumassutilittut isigineqartunut pisassiissutit amerlisinneqarput.
Tusaniaanermi akissutigisat sapinngisamik agguaasinermi malinniarneqarput, taakkulu saniatigut ukiup siuliani kommunini pisanik sippuinerit ilanngaatigineqarlutik. Agguaaneq tabelimi takutinneqarpoq:
Kommune Qilalukkat qaqortat
2007-2008 (amerl.) Qilalukkat qernertat
2007-2008 (amerl.)
Qaanaaq 20 65
Savissivik * 20
Upernavik 44 73
Uummannaq 10 79
Qeqertarsuaq 12 19
Ilulissat 40 2
Qasigiannguit 0 4
Aasiaat 3 22
Kangaatsiaq 12 8
Sisimiut 13 #
Maniitsoq 3 #
Ukiumit pisassiissuteqarfiusumit 2006-2007 sippuinerit 8 8
Katillugit 165 300
* Qaanaap Kommunianut pisassiissuteqernermut ilaavoq.
# Qilalukkanik qernertanik pisassinneqakkajunneq ajorpoq.
Aalisarnermut, Piniarnermut Nunalerinermullu Pisortaqarfiup oqaatigissavaa Pisortaqarfiup pisassiissutinik agguaanera piniarnermik aallartitsinissamut inunnut akuersissutaanngimmat. Piniarneq aallartinneqarsinnaavoq aatsaat kommunit pisassiissutisiaminnik agguaareerpata inunnullu akuerineqarsinnaatitaasunut akuersissuteqareerpata. Akuersissut inummut pineqartumuinnaq atuuppoq allamullu tunniunneqarsinnaanani. Nalunaarummi § 5 naapertorlugu akuersissuteqarfigineqartoq qilalukkamik qaqortamik qernertamilluunniit ukiumi akuersissuteqarfiusumi taaneqartumik pisaqarsinnaatitaavoq.
Nalunaarummi §20, imm. 1 aamma imm. 2 naapertorlugu qaqortanik qernertanillu pisat, pisarisuukkat annaasallu tamarmit pisaqarnermi immersugassamut, kommunip pisaqarsinnaannermut allagartamik piniartumut tunniussinerani ilaangussamut allanneqassapput. Immersuinermi Nalornisoqassappat kommuni ikiuunissaminut piareersimasussaavoq.
Aalisarnermut, Piniarnermut Nunalerinermullu Pisortaqarfiup erseqqissaatigaa qilalukkanik qaqortanik qernertanillu illersuineq piniarnerlu pillugit nalunaarummi § 5, imm. 3 naapertorlugu kommunimut pisassiissutinik qularnaatsumik nakkutilliinissaq kommunip akisussaaffigimmagu. Tamatuma nassataraa kommunip pisanik tamarmiusunik nalunaarsuinermik ingerlaavartumik nutarterisarnissaa pisassiissutillu qaqugukkut nungunneqarnerinik nakkutiginninnissaa. Aammattaaq § 5, imm. 4 naapertorlugu pisassiissutit nungunniariarpata piniarnerup ingerlaannaq unitsinneqarnissaa tamatumalu allakkatigut Pisortaqarfimmut nalunaarutiginissaa kommunip qularnaassavaa.
Pisassiissutinik sippuineq sunaluunniit kommunip akisussaaffigaa sippuinerillu § 20, imm. 4 naapertorlugu ukiumut tulliuttumut pisassiissutinit ilanngaatigineqassapput.
Pisortaqarfimmi Piniarnermut Immikkoortortaq sukkulluunniit attavigineqarsinnaavoq kiisalu kommuninut pisassiissutinik aqutsineq pillugu siunnersuillunilu ilitsersuisinnaalluni immersuinermullu ikiuusinnaalluni.
Paasissutissat sukumiinerusut pillugit attavigineqarsinnaavoq Lars Geråe
Aalisarnermut, Piniarnermut Nunalerinermullu Pisortaqarfik
