Naalakkersuisut Qalasersuaq pillugu ernumassuteqanngillat

Qalasersuarmik piginnittuujumallutik nunat allat suaaruteqaqattaarnerat nunatsinni naalakkersuisunit ernumassutigineqanngilaq, Nunanut Allanut Naalakkersuisoq Aleqa Hammond oqarpoq. Nunarsuarmioqatigiit imavinnik inatsit pillugu isumaqatigiissut aallavigalugu taamaallaat qanoq iliuuseqarsinnaapput, taamaattumillu Qalasersuarmik piginnittuunerarlutik oqaluttut imavik pillugu inatsimmi unioqqutitsissapput, Aleqa Hammond oqarpoq.

Nunat allat imavinnik isumaqatigiissut unioqqutillugu namminneq Qalasersuaq piginerarluguisummersorsinnaanngillat. Nunarput aqqutigalugu Qalersersuarmut ingerlaartoqassappat, taava nunarsuamiut imavimmik isumaqatigiissutaat malillugu qanoq iliuuseqartussaavugut, Aleqa Hammond oqarpoq.

Imavinnik inatsisit pillugit isumaqatigiissut Danmarkip Savalimmiut Kalallillu Nunaata ukioq 2004-mi atsioqatigiinnikkut atuutsilersippaat, tassani

Nunamiit avammut 200 sømilinik avasitsigisoq tikillugu pigisutut naatsorsuutigineqarluni. 200 sømil qaangerlugu pigisutut naatsorsuuteqartoqaruni, 350 sømil avasitsigisoq tikillugu qinnuteqaatigineqarsinnaavoq nunat tamat immap naqqatigut killeqarfiit pillugit oqartussaasunut.

Qallunaat naalakkersuisui nunatsinnilu naalakkersuisut suleqatigiillutik Kalaallit Nunaanniit immap naqqatigut qalasersuup tungaanut ataneqarnersoq ilisimatuussutsikkut misissuisitsipput. Misissuinerillu inernerat ukioq 2014-imi naalagaaffiit peqatigiinnut tunniunneqassaaq,

Nunat naalagaaffigatigiit Danmark, Savalimmiut Kalallillu Nunaat suleqatigiissitaqarpoq, nunatsinniit Qalasersuup tungaanut ataneqarnersoq ilisimatuussutsikkut misissuinermik malinnaatinneqartumik.