Naalakkersuisut Qaanaamut tikippata akerliussutsimik takutitsiffineqassapput
Naalakkersuit aqagu Qaanaamut tikippata, Qaanaami innuttaasut akerliussutsiminnik takutitsinissaminnik pilersaarusiorput.
Akerliussutsimik takutitsinissamut pilersaarusiortut oqaaseqartartuat Mikissuk Petersen tusagassiuutinut allappoq.
Innuttaasut ataatsimiisinneqarneranni Karen Littauer-ip peqataatinneqarnissaa piumasarineqarpoq, pikkorissartitsisinini pillugu inunnut ataasiakkaanut sianeqattaaarluni paasiniaasaqattaarnera kissaatigineqanngimmat.
Naalakkersuisut ulluni amerlanerusuni Qaanaamiinnissaat kajumissaarutigineqarpoq, Karen Littauerip pikkorissartitsinerani peqataasimasut ataasiakkaat ataatsimeeqatigineqarnissaat kissaatigineqarmat.
Tarnip pissusaanik immikkut ilisimasalimmik Qaanaaliartitsisoqarnissaq piumasarineqarpoq, pikkorissartitsinermi meeqqat inersimasullu misigissutsimikkut ammarsarneqarsimasut ikiorneqarniassammata.
Naalakkersuisut Qaanaami imigassamik tassanngaannartumik matusinerisa kingorna, innuttaasut ilaat ikiorneqarnissaminnut pisariaqartitsisimapput, Qaanaami akerliussutsimik takutitsinissamut pilersaarusiortut oqaaseqartartuat Mikissuk Petersen tusagassiuutinut allaqarnermini ilaatigut taamatut allappoq.
Naalakkersuisut aqagu Qaanamukartussat tassaapput Naalakkersuisut siulittaasuat Hans Enoksen Ilaqutariinnermut Naalakkersuisoq Aleqa Hammond kiisalu Peqqissutsimut Naalakkersuisoq Arkalo Abelsen. Naalakkersuisut ulluni sisamani Qaanaaq nunarfiilu angallaviginiarlugit pilersaarutigaat.
