Naalakkersuisut: Pujortartarneq pillugu sukatereqqittoqassaaq
Pujortartarneq pillugu inatsit sukanganerusoq piaarnerpaamik akuersissutigineqassasoq Naalakkersuisut kissaatigaat, siunnersuulli pimoorussisumik tusarniaassutigineqareerpat, tamanna pisinnaasoq erseqqissaatigalugu.
Pujortartarneq pillugu inatsisissap, Inatsisartut ukiakkut ataatsimiinneranni saqqummiunneqartussaagaluartup, kinguartinneqarneranut aningaasat tunngaviusut ernummatigalugu Atuagagdliutit ippassigami allaatigaat.
Tamannali Peqqissutsimut Naalakkersuisup Agathe Fontainip eqqortuunnginnerarpaa.
Inuit eqqorneqartussat, matumani neriniartarfiit unnuisarfiillu ilanngullugit, tusarniaavigineqarsimannginnerat kinguartitsinermut patsisaasoq aalajangiusimavaa. Taanna naalakkersuisutut 2009-mi juunimi atuutilermat, pujortartarneq pillugu inatsisissap saqqummiunnissaanut atortussanik atorneqarsinnaasunik peqartoqarsimanngilaq, tamannalu upernaakkut ataatsimiinnissamut kinguartitsinermut pissutaavoq.
Pujortartarnerup akiorniarneqarnera inuit peqqinnerulernissaannut pilersaarummi Inuunerittami annertuumik suliniutigineqarpoq, pujortartartullu ukiuni makkunani ikiliartormata Agathe Fontainip nuannaarutigaa.
Tupamut akitsuutit qaffannerat, pinaveersaartitsinermik suliniutit tamatumani patsisaapput, tullinnguupporlu pujortartarnermut inatsisip sukanganerusup piviusunngortinnissaa, Agathe Fontain naqissusiivoq.
