Naalakkersuisut Puisi A/S-mut tunngasumik suliaq unitsippaat
Aningaasammi taama amerlatigisut suliniummut paasiuminaatsumut, puisip neqaanik amianillu atorluaanermik kinguneqartussamut, sulili aallartinnaniluunniit taamaatiinnarneqartumut atorneqarmata. Nittartakkami Sermitsiaq.AG-mi ippassaq taama aallaaserinnittoqarpoq.
Tamatuma kingorna Namminersorlutik Oqartussat aningaasanut annaaneqartunut, Puisip siulersuisui akisussaatinniaraluarpaat, tamanna Nunatta Eqqartuussiviani siorna ajorsassutigalugu.
Eqqartuussiviulli aalajangiinera suliareqqittassanngortippaat.
Jens B. Frederiksen Sermitsiaq.Ag-mut ippassaq nassuiaalluni oqarpoq, suliassap taamaatiinnarneqarnissaa, Namminersorlutik Oqartussani inatsisilerinermut allaffeqarfimmi eqqartuussissuserisunillu avataaneersunik nalilersueqatiginnereernikkut aalajangiunneqartoq.
Jens B. Frederiksenip oqaatigaa ilassutaasumik nassuiaat ilisimannittut oqaaseqaataannik nutaanik, eqqartuussut Namminersorlutik Oqartussanit suliassamik ingerlatitseqqinnerup nalaani ilisimaneqanngitsunik, saqqummersoqarsimasoq.
Suliaq pineqartoq uggornartutut oqaatigaa, ullumikkulli naalakkersuisoqatigiit isumatuumik torersumillu iliuuseqarsimanerat aalajangiusimanerarlugu.
- Tassami suliaq iternga tikillugu misissuiffigineqartussaasimavoq, tamannami siulersuisut akisussaaffiinut atatillugu tunngaviusumik inissisimammat.
Jens B. Fredriksen aamma isumaqarpoq, ullumikkut naalaakkersuisoqatigiit Namminersorlutik Oqartussat suliffeqarfiutaanni siulersuisunik ilisimasaqarluartunngortitsinerisigut, siunissami suliamik assingusumik pisoqaqqissinnaaneranut iliuusissanik pitsaanerpaanik iliuuseqarsimasut.