Naalakkersuisut politimesteri akuliuteqquaat

Attartortumiit piginnittumiit aaqqissuussineq pillugu Kalaallit Nunaanni politimesterip misissueqqissaarnissaa naalakkersuisooqatigiit piumasarilerpaat.
apriilip 25-at 2008 10:37

Attartortumiit piginnittuulernermut aaqqissuussinermut innarliisut akisussaatinneqarnissaat Atassutikkut piumasaqaatigaat, inuillu pineqartut qinikkatut sulinerminnit tunuarnissaat kaammattuutigalugu. Naalakkersuisoqatigiit ullaap tungaa ataatsimeeqatigiinnerminni tamanna ilaatigut eqqartorpaat.

Naalakkersuisut siulittaasuat Hans Enoksen tamanna pillugu ima oqarpoq:

- Atassutip nalunaarutaa ataatsimiinnermi eqqartorparput , tassani naalakkersuisut matooriniartutut illersuisutullu nipilerlugit avammut oqariartortoqarnera akuerisinnaannginnatsigu suliap politimesterimit misissoqqissaarneqarnissaa piumasaraarput, Hans Enoksen oqarpoq.

Atassutip taamatut nipilimmik oqariartuuteqarnera ilungersunarnerarpaa:

- Allatut ajornaqaaq misissuisoqartariaqarpoq. Unioqqutitsilluni illunik niuerniartoqarnissaa uagutsinnut siunertaanngilluinnaqqissaarpoq. Aamma innuttaasut immikkoortinneqanngillat, pisiarinnikkumallutik saaffiginnittut akuerineqarnikuupput. Aamma uagutsinnut toqqissisimanarnerussaaq sukumiisumik suna tamaat paasineqarpat. Pasilliutit tuinngavissaqanngitsut, ilaatigut inuttut ilungersunartut qaangerneqartariaqalermata, pingaartumik aamma illunik pisisimasut eqqarsaatigalugit.

Atassummit taamatut oqariartuuteqarneq naalakkersuisooqatigiinnut innarliissasoq Hans Enoksenip naatsorsuutiginngilaa.

- Suliap sukumiisumik politiinit qulaajarneqarnissaa piumaffigivarput, taanna qanoq kinguneqassanersoq utaqqissavarput, Hans Enoksen oqarpoq.

Finn Karlsenip naalakkersuisut isumaqatigiissutaat iluarisimaarpaa.

- Kaammattuutigut malinneqanngippata suliap inernissaa utaqqisariaqassavarput, taamaammat naalakkersuisooqatigiinni isumaqatigiissutigaarput politimesteri suliamut akuliunneqartariaqartoq.

Eqqortoq nassaarineqassappat pinngitsoornata taamaasiortariaqarpugut, Finn Karlsen oqarpoq.