Naalakkersuisut politiinut attaveqarpallaanngillat

Namminersornerulerattali naalakkersuisut politiinut attaveqartarnerat nalaatsornerinnakkut pisarsimavoq, naalakkersuisut ilaat ataavartumik malinnaatinneqartut ilaat ataasiarlutilluunniit paasiniaaneq ajorput.
Allattoq Elisa Isaksen
novembarip 01-at 2007 16:57

Nalunngilarput eqqarsaatigerpiarnerli ajorlugu. Tassami politiit suliaat sumiginnaanerit, atornerluinerit pinerlunnerillu tamarmik Justitsministeriamit Danmarkimit akisussaaffigineqarput. Sullitaat avatangiisilu tamarmik Namminersornerullutik Oqartussaniittuusoq.

Inatsiseqarnermut naalakkersuisuusartut politimesterillu akornganni attaveqarneq aammalu Pinerluuteqarsimasunik nakkutilliisoqarfimmut attaveqarneq aaqqissugaavallaarpalunngilaq.

” Naalakkersuisut kikkut issianerat naapertorlugu immaqa politimestereqarfimmut attaveqarneq akulikillisarpoq ilaannilu annertuvallaarunnaartarluni immaqa taanna politikerit pikkoriffiginerusariaqarpaat ”

Taamatut oqarpoq Aqqaluk Petersen politiit peqatigiiffianni siulittaasoq.

Tassa kina naalakkersuisuunersoq apeqqutaalluni sumiginnaanerit, atornerluinerit pinerlunnerillu paasissutissiissutiginerat ingerlalertarpoq unittarlunilu.

Elisæus Kreutzmann, Pinerluuteqarsimasunut Nakkutillisoqarfiup pisortaa oqaluttuarpoq ukiuni arlalissuarni naalakkersuisuusartut marluinnaviit ukiumut ataasiarlutik paasissutissiiffigeqarusullutik ataatsimeeqatiserisarsimagaanni, sinnerisa pinerluuteqarsimasunut tunngasunik paasiniaanissartik soqutigisarsimanngilaat.

Pinerluuteqarsimasunut Nakkutilliisoqarfik nunatsinnit akisussaaffigineqaraluaruni ima kinguneqarsinnaagaluarpoq:

”Pilersaarusiussagaanni aammalu oqaloqatigiissutigalugit tamattalu maani nunatsinniilluta assersuutigalugu taava nalunngisaqarnerullutalu aammalu ajornannginnerussaaq tamatsinnut ataqatigiissumik arlaannik pilersaarusiorluta ajornartorsiutit ukorpiaat imaalillugit aaqqeriartariaqarpagut tassuunakkut soorunami ajunnginerussaaq aamma piuminarnerussallunilu”

Elisæus Kreutzmannip erseqqissatigaa Eqqartuussiveqarneq pillugu ataatsimiitsitaliarsuup innersuussutiginikuugaat inatsiseqarnermut tunngasut uterteqqunngikkallarlugit, parnaarussiviit isertitsiviit allaffiillu aserfallatsaaligassat suli amerlavallaaqimmata.