Naalakkersuisut: Piumasaqarnerinnaq pillugu naapeqatigiinnianngilagut

- Piumasaqarnerinnaq pillugu naapeqatigiinnianngilagut, kisianni paaseqatigiinnerusumik oqaloqatigiinnerunissaq taanna siunertaraarput, Nunamut Namminermut, Pinngortitamut Avatagiisinullu Naalakkersuisoq, Anthon Frederiksen naalakkersuisuit sinnerlugit kommunit pillugit isumasoiqatigiisitsinermut aggersaasoq oqarpoq.

- Paaseqatigiinnerusumik oqaloqatigiinnerunissaq taanna siunertaraarput, imaanngilaq Naalakkersuisuninngaanniik piumasaqarnerinnaq pillugu naapinniartugut, kisianni aamma tusaaniarpagut kommunit qanoq oqariartuuteqarumaarnersut, Nunamut namminermut pinngortitamut avatangiisinullu Naalakkersuisoq Anthon Frederiksen kommunit pillugit isumasioqatigiinnissap aallartinngitsiarnerani taama oqarpoq.

Naalakkersuisut Kommunit pillugit isumasioqatigiisitsinissaat Ilulissani aqagu aallartinneqarpat, Kommunerujussuit ukiuni siullerni pingasuni ingerlasimaneri nalilersuiffigineqarlutik oqaluuserineqassapput.

Soorlu Qaasuitsup kommuniani kommunalbestyrelsemut ilaasortat kommunerujussuup avinneqarnissaanut siunnersuuteqarsimanerinut tunngasut oqaluuserineqarnissaanut ammaffigineqaput.

-Tamakkua soorunami kommunip kommunalbestyrelsellu nammineerluni aalajangersungassarai, kisianni soorunami aamma kissaatigisat taamaatut eqqartorneqarnissaanut Naalakkersuisuninngaanniit matoqqanngilagut, Anthon Frederiksen oqarpoq.

Siunissamilu isertitagut periarfissat inuussutissarsiornikkullu periarfissat aamma sammineqassapput.

-Inuussutissarsiornikkut periarfissat suut, sumiiffinni assigiinngitsuni pillugit, aamma kommunit maannakkumut suleqataaffigeriigaat eqqartorneqassapput. Aningaasaqarnermut naalakkersuisoq aamma ilaavoq, tassani kommunit aningaasaqarnerinut tunngasut qanoq iliorluni siunissami pitsaanerusumik aaqqiissuteqarsinnaanerit, tamakku eqqartorneqassapput, Anthon Frederiksen oqarpoq.

Isumasioqatigiinnissami kommunit borgmesterii, aningaasaqarnermut ataatsimiititaliani ilaasortat, kommuneni atorfilittat aamma KANUKOKAp siulersuisui kanunupelu ilaasortat peqataassapput. Soorlu aamma Islandimi Savalimmiunilu naalakkersuisut saqqummiisussatut peqataatinneqassallutik. Isumasioqatigiinnerlu naggaserlugu naalakkersuisut borgmesterillu ataatsimeeqatigiissapput.

- Alloriarfissagut assigiinngitsut naatsorsuutigivara tassani aamma paaseqatigiiffigisinnaassagivut, Naalakkersuisunut ilaasortaq Anthon Frederiksen oqarpoq