Naalakkersuisut: Isumaqatigiissut USA-mit tamakkiisumik malinneqanngilaq
Inuussutissarsiornermut, Suliffeqarnermut, Niuernermut Nunanullu allanut Naalakkersuisoq, Vittus Qujaukitsoq, Sara Olsvigip Inuit Ataqatigiinneersup Pituffimmi kiffartuussinissamik isumaqatigiissut assortuussutaasoq pillugu § 37 naapertorlugu arlalinnik apeqqutaanut akissuteqarluni taama allappoq.
Suliarli tassunga killeqarsorinngilaa:
- Ilisimaneqarpoq suliffeqarfiit neqeroortitsinermut akuusut arlallit tamatuma kingorna Amerikami oqartussaasunut aalajangiinermut akerliliissuteqarsimasut, maannakkut suliassaq suliarineqarluni, taamaattumik maannamut tamanna Amerikami oqartussaasut aamma ingerlatseqatigiiffiit akornanni suliassaalluni, Vittus Qujaukitsoq allappoq, amerikamiulli kalaallinik nunaqavissunik sulisussaminnik ilinniartussaminnillu atorfinitsitsisarnermik ingerlatsiinnarnissaat aamma naatsorsuutigalugu.
Vittus Qujaukitsulli aamma nassuerutigaa Pituffimmit akileraarutitigut isertitaasartut taamaaginnarnissaat naatsorsuutigineqarsinnaassanngitsoq.
- Aki maannamut atuussimasumit appasinnerungaatsiartoq tunngavigalugu Exelis A/S isumaqatigiissummik pinnassimanera, isumaqatigiissummilu aningaasat ilarujussuisa akissarsianut atorneqartussaanerat pissutigalugit, akileraarutitigut isertitassat piffissamut isumaqatigiissuteqarfiusumut kingullermut naleqqiullugit ikinnerunissaat naatsorsuutigisariaqarpoq, Naalakkersuisoq Vittus Qujaukitsoq Sara Olsvigip § 37 naapertorlugu apeqqutaanut akissuteqarluni taama allappoq.
